12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Շվեդիայում 5 մարդ է ձերբակալվել Ղուրանն այրելու գործով
Քաղաքականություն
04.04.2023 | 19:58
Շվեդիայի ոստիկանության անվտանգության ծառայությունը հայտնել է, որ հինգ անձ է ձերբակալվել ահաբեկչական հանցագործություններ կատարելու համար դավադրության կասկածանքով՝ Ստոկհոլմում Ղուրանի այրման ակցիաներից հետո, գրում է Al Arabiya-ն՝ վկայակոչելով Reuters-ին։
Հունվարին ծայրահեղ աջ ակտիվիստի կողմից Ստոկհոլմում Ղուրանի պատճենի այրումը մահմեդական որոշ երկրներում վրդովմունք էր առաջացրել և վնաս հասցրել ՆԱՏՕ-ին անդամակցելու՝ Շվեդիայի հայտի վավերացմանը, որի պատճառով Թուրքիան դադարեցրեց բանակցությունները:
Անվտանգության ծառայությունը հայտնում է, որ հինգ տղամարդ է ձերբակալվել համակարգված գործողության ժամանակ։ Ենթադրվում է, որ կասկածյալները միջազգային կապեր ունեն ծայրահեղականության հետ։
«Ներկայիս գործը մեկն է այն մի քանի դեպքերից, որոնց վրա աշխատել է ոստիկանության անվտանգության ծառայությունը բողոքի ցույցերից հետո, որոնք ուղղված էին Շվեդիայի դեմ՝ կապված հունվարին Ղուրանի այրման միջադեպի հետ»,- ասվում է հայտարարության մեջ:
Առանձին հայտարարությամբ էլ Շվեդիայի դատախազությունը հայտնել է, որ դատախազը մինչև ուրբաթ պետք է որոշի՝ արդյո՞ք նշված անձինք կմնան կալանքի տակ:
Բողոքի ցույցից հետո շվեդական ոստիկանությունը թույլ չէր տվել մի քանի ցույցեր անցկացնել, որոնց ընթացքում պետք է Ղուրան այրեին: Այնուամենայնիվ, շվեդական դատարանը որոշում է կայացրել, որ նման բողոքի ակցիաները պաշտպանված են Շվեդիայի Սահմանադրությամբ:
Էմմա Չոբանյան
