06.06.2026 | 22:18
Երկրաշարժ Սպիտակ քաղաքից 11 կմ հարավ-արևելք
Ֆրանսիայի Սենատում Արցախին նվիրված համաժողովին ի պատասխան՝ Ադրբեջանի Մեջլիսը հակաֆրանսիական հայտարարություն է ընդունել
Քաղաքականություն
04.04.2023 | 15:03
Ադրբեջանի Միլի Մեջլիսն այսօր հերթական հակաֆրանսիական հայտարարությունն է ընդունել։ Դրանում, մասնավորապես, նշվում է, որ «Արցախյան երկրորդ պատերազմից հետո Ֆրանսիայի խորհրդարանը գործիք է դարձել ուժերի համար, որոնք Ադրբեջանի դեմ արշավ են իրականացնում»։
«Այն ժամանակ, երբ ակտիվանում են միջազգային ջանքերը Հայաստանի հետ խաղաղության պայմանագիր կնքելու ուղղությամբ, Ֆրանսիայի Սենատի քայլը ծառայում է ռևանշիզմին։ Անթույլատրելի է, որ Ֆրանսիան, խուսափելով ազգային փոքրամասնությունների իրավունքների պաշտպանությունից, ակտիվություն ցուցաբերի Ադրբեջանում հայկական փոքրամասնության հետ կապված։ Ֆրանսիայի Սենատում կայացած համաժողովը քաղաքական կեղծավորության վառ օրինակ է»,- ասվում է հայտարարության մեջ։
Նշվում է, որ «տարածաշրջանում կորցրած դիրքերը վերականգնելու՝ Ֆրանսիայի կոպիտ փորձերը դատապարտված են ձախողման»։
«Ֆրանսիական կողմի վերջին սադրիչ քայլերի համատեքստում Ադրբեջանի խորհրդարանը ևս մեկ անգամ ցուցադրում է իր սկզբունքային դիրքորոշումը՝ կոչ անելով Ֆրանսիայի Սենատին հրաժարվել Հարավային Կովկասում իրադարձությունների խեղաթյուրման, Ադրբեջանի ինքնիշխանության, տարածքային ամբողջականության դեմ ուղղված գործողություններից, Ադրբեջանի ներքին գործերին միջամտությունից, քայլեր ձեռնարկել Հայաստանի և Ադրբեջանի միջև երկարատև խաղաղություն հաստատելու համար»,- ասվում է հայտարարության մեջ։
Հավելենք, որ Բաքվի նման նյարդային արձագանքի պատճառը մարտի 16-ին Ֆրանսիայի Սենատում տեղի ունեցած «Ի աջակցություն Հայաստանի և Արցախի» խորագրով համաժողովն է՝ ֆրանսիացի ականավոր մտավորականների և խորհրդարանականների մասնակցությամբ:
Էմմա Չոբանյան
