10.04.2026 | 17:22
Քննարկվել են կիսահաղորդիչների, ռոբոտատեխնիկայի և արհեստական բանականության զարգացման պետական ծրագրերը
Դոնալդ Թրամփի դատավարությունը լուսաբանել չի թույլատրվի
Քաղաքականություն
04.04.2023 | 14:54
Նյու Յորքի Գերագույն դատարանի դատավորի ժամանակավոր պաշտոնակատար Խուան Մերչանը մերժել է մի շարք լրատվամիջոցների՝ ԱՄՆ նախկին նախագահ Դոնալդ Թրամփի գործով դատական նիստից ուղիղ հեռարձակման հնարավորության խնդրանքը, հայտնում է CNN-ը։
Նշվում է, որ Մերչանն իր որոշումը կայացրել է այն բանից հետո, երբ Թրամփի փաստաբանական թիմը դեմ է արտահայտվել դատարանի դահլիճում տեսախցիկների առկայությանը՝ ասելով, որ դա «կրկեսի» մթնոլորտ կստեղծի։ Այնուամենայնիվ, Մերչանը թույլ է տվել հինգ լուսանկարիչների լուսանկարել դատավարության մեկնարկը՝ «մինչև դատարանի աշխատակիցները նրանց կկարգադրեն հեռանալ՝ տեղ ազատելով երդվյալ ատենակալների համար»:
Ավելի վաղ Նյու Յորք ժամանած Թրամփը հայտնել էր, որ երեքշաբթի դատարանում իրեն մեղադրանք է առաջադրվելու 33 կետով։ Դրանցից մի քանիսը վերաբերում են բիզնեսում խարդախությանը։ Բոլորը Մանհեթենի շրջանային դատախազ Էլվին Բրեգի կողմից վերաորակվել են որպես քրեական։
Նախկին նախագահը չի ընդունել այդ մեղադրանքները և իր հերթին մեղադրել է դատախազին տեղեկատվության արտահոսքի մեջ՝ ասելով, որ վերջինս պետք է հրաժարական տա։
Հիշեցնենք, որ մարտի 30-ին Նյու Յորքի դատարանի երդվյալ ատենակալները մեղադրական եզրակացություն էին ներկայացրել Դոնալդ Թրամփի՝ մեծահասակների համար ֆիլմերի դերասանուհի Սթորմի Դենիելսին 130,000 դոլար վճարելու գործով։ Դատախազության վարկածի համաձայն՝ վերջինիս գումար են տվել՝ Թրամփի հետ հարաբերությունների մասին «լռություն գնելու» համար։ Թրամփը երդվյալ ատենակալների դատավճիռն անվանել է «քաղաքական հետապնդում»։
Տաթև Ֆռանգյան
