Քաղաքականություն
04.04.2023 | 13:51
Մոսկվայում մեկնարկել է ՌԴ-ի, Սիրիայի, Թուրքիայի և Իրանի ԱԳ փոխնախարարների հանդիպումը, գրում են թուրքական լրատվամիջոցները։
Հանդիպմանը մասնակցում են Թուրքիայի ԱԳ փոխնախարար Բուրաք Աքչափարը, Սիրիայի ԱԳ փոխնախարար Այման Սուսանը, Իրանի ԱԳ նախարարի քաղաքական հարցերով խորհրդական Ալի Ասգար Հաջին և ՌԴ ԱԳ փոխնախարար Միխայիլ Բոգդանովը։ Քառակողմ հանդիպումից առաջ Բոգդանովը երկկողմ հանդիպումներ է ունեցել թուրք, իրանցի և սիրիացի գործընկերների հետ։
Նշվում է նաև, որ հանդիպման մեկնարկին ՌԴ ԱԳ նախարար Սերգեյ Լավրովը կարճ ելույթ է ունեցել։ Հանդիպումն ընթանում է լրատվամիջոցների համար փակ ռեժիմով, օրակարգում Սիրիայի և Թուրքիայի հարաբերությունների կարգավորումն է։
Հավելենք, որ նախօրեին Թուրքիայի ԱԳ նախարար Մևլութ Չավուշօղլուն հայտնել էր, որ հանդիպումը տեղի է ունենալու ապրիլի 3-4-ը։
«Վերջերս Եգիպտոս կատարած այցի ժամանակ մենք հայտարարեցինք փոխնախարարների մակարդակով քառակողմ հանդիպման ժամկետի հետաձգման մասին։ Հանդիպման նոր ժամկետն արդեն համաձայնեցված է։ Այն տեղի կունենա ապրիլի 3-4-ը Մոսկվայում»,- ասել էր Չավուշօղլուն։
Էմմա Չոբանյան
