ՌԴ-ն չեղարկել է ԱՊՀ երկրների զինվորականներին կենսաթոշակների վճարման մասին համաձայնագիրը

ՌԴ նախագահ Վլադիմիր Պուտինն օրենք է ստորագրել Անկախ Պետությունների Համագործակցության մասնակից երկրների զինվորականների և նրանց ընտանիքների անդամների կենսաթոշակների և պետական ապահովագրության մասին համաձայնագրի չեղարկման մասին։ Այս մասին հայտնում է իրավական տեղեկատվության պաշտոնական պորտալը, փոխանցում է Ինտերֆաքսը։

Չեղարկվել է նաև ԱՊՀ անդամ երկրների սահմանապահ զորքերի զինծառայողներին, նրանց ընտանիքների անդամներին կենսաթոշակ տրամադրելու և սահմանապահ զորքերի զինծառայողներին պետական ապահովագրության կարգի վերաբերյալ համաձայնագիրը։

Օրենքի բացատրական գրության մեջ նշվում է, որ խոսքը 1992 թվականի մայիսի 15-ի պայմանագրերի մասին է, որոնց մասնակիցներն են Հայաստանը, Ադրբեջանը, Բելառուսը, Ղազախստանը, Ղրղզստանը, Մոլդովան, Տաջիկստանը, Ուզբեկստանը, Ուկրաինան։

Բացատրական գրությունում նշվում է նաև, որ 1992 թվականի մայիսի 15-ի պայմանագրերում կիրառվող տարածքային սկզբունքը թույլ էր տալիս, որ այս միջազգային պայմանագրերը կնքած պետություններից մեկն օբյեկտիվ պատճառներով (միգրացիոն գործընթացների զարգացում, կենսաթոշակային ապահովման ավելի բարձր մակարդակ, նվազագույն ստաժ, որը պահանջվում է կենսաթոշակ նշանակելու համար) կարող է ավելի մեծ ծախսեր կրել, քան մեկ այլ պետություն:

Միևնույն ժամանակ, վերջին տարիներին զգալիորեն աճել են Ռուսաստանի Դաշնության պետական մարմինների կողմից ո՛չ ԽՍՀՄ-ում, ո՛չ էլ Ռուսաստանի Դաշնությունում զինվորական ծառայություն չանցած անձանց կենսաթոշակ վճարելու դեպքերը։ Կենսաթոշակների նշանակման և վճարման կարգը, որը նախատեսված է 1992 թվականի մայիսի 15-ի պայմանագրերով, հանգեցնում է օտարերկրյա զինվորական թոշակառուների ֆիկտիվ միգրացիոն հոսքերի ավելացմանը դեպի Ռուսաստանի Դաշնություն, որտեղ կենսաթոշակների մակարդակն ամենաբարձրն է, ասվում է բացատրական գրության մեջ։

Միաժամանակ, նախկին ռուս զինվորական թոշակառուների համար, ովքեր մշտական բնակության են տեղափոխվել ԱՊՀ անդամ երկրներից որևէ մեկի տարածքում, կենսաթոշակը շատ ավելի ցածր է, ինչն արդարացի բողոքներ է առաջացնում, նշել են նախաձեռնությունը մշակողները։

Ըստ բացատրական գրության՝ քանի որ 1992 թվականի մայիսի 15-ի համաձայնագրերը հիմնականում ուղղված են եղել ԽՍՀՄ զինվորականների կենսաթոշակային իրավունքների պաշտպանությանը, իսկ 30 տարվա ընթացքում ԱՊՀ անդամ երկրներում այդ հարցի վերաբերյալ ձևավորվել է ազգային օրենսդրություն, համաձայնագիրը կատարել է իր խնդիրը՝ անցումային շրջանում ապահովել զինվորական ծառայությունից ազատված անձանց կենսաթոշակային իրավունքները։

Տաթև Ֆռանգյան