Բայրամովը ԵՄ պաշտոնյային բողոքել է Հայաստանում տեղակայված առաքելությունից

Ադրբեջանի ԱԳ նախարար Ջեյհուն Բայրամովը  ընդունել է ԵՄ Արևելյան գործընկերության եվրոպական ծառայության արտաքին կապերի հատուկ ներկայացուցիչ Դիրք Շյուբելի հետ, գրում են տեղական լրատվամիջոցները։ Խոսելով Ադրբեջանի և ԵՄ-ի միջև տարբեր ոլորտներում համագործակցության արդյունավետ օրակարգի առկայության մասին, այդ թվում՝ քաղաքական, տնտեսական, առևտուր, տրանսպորտ, էներգետիկ անվտանգություն և այլն, Բայրամովը վստահություն է հայտնել, որ ներկայում քննարկվող նոր համապարփակ համաձայնագրի նախագիծը կնպաստի հարաբերությունների հետագա զարգացմանը։

Բայրամովը, ինչպես միշտ, բողոքել է ՀՀ-ում տեղակայված ԵՄ քաղաքացիական առաքելությունից՝ կեղծիքներ հնչեցնելով։ Ադրբեջանի ԱԳ նախարարը խոսել է «Հայաստանի հետ հարաբերությունների կարգավորման և առաջխաղացման ուղղությամբ գործադրվող ջանքերի, խաղաղության օրակարգի մասին»։ Բայրամովը Հայաստանին անհիմն մեղադրել է «սեփական պարտավորությունները կատարելուց խուսափելու, ռազմաքաղաքական սադրանքների, ականային սպառնալիքի մեջ»։

Ադրբեջանի ԱԳ նախարարը հայտարարել է, թե «Հայաստանի կողմից իրականացվող սադրանքների ինտենսիվության վերջին աճը համընկնում է ԵՄ առաքելության Հայաստան այցի հետ և ընդգծել առաքելության չարաշահման անթույլատրելիությունը՝ որպես պատրվակ՝ խաթարելու Ադրբեջանի և Հայաստանի միջև հարաբերությունների կարգավորման գործընթացը»։

Հավելենք, որ պաշտոնական Բաքուն պարբերաբար իր դժգոհություններն է հայտնում Հայաստանում ԵՄ քաղաքացիական առաքելության տեղակայումից։

Էմմա Չոբանյան