08.10.2026 | 16:21
Հայտնի է՝ ինչու է Արթուր Ալեքսանյանը բաց թողնելու աշխարհի առաջնությունը
Էրդողանը հայտարարել է, որ ԱՄՆ դեսպանի համար իր դռները փակ են և «Վաշինգտոնին պետք է դաս տալ»
Քաղաքականություն
03.04.2023 | 13:13
Թուրքիայի նախագահ Ռեջեփ Թայիփ Էրդողանը նախօրեին Ստամբուլի բարեգործական կազմակերպություններից մեկում հանդիպման ժամանակ խոսել է նաև մայիսի 14-ին կայանալիք ընտրությունների մասին՝ այս համատեքստում անդրադառնալով ընդդիմության միասնական թեկնածու Քեմալ Քըլըչդարօղլուի հետ ԱՄՆ դեսպանի հանդիպմանը, գրում են տեղական լրատվամիջոցները։
«Այս ընտրություններում Ամերիկային պետք է դաս տանք։ Ջո Բայդենն այնտեղից է խոսում․ ի՞նչ է անում այստեղ Բայդենի դեսպանը, գնում է պարոն Քեմալին այցելում։ Ամո՛թ է, գլուխդ գործածի։ Դուք դեսպան եք, Ձեր զրուցակիցն այստեղ նախագահն է։ Այսուհետև ի՞նչ դեմքով եք նախագահից հանդիպու խնդրելու։ Մեր դռները նրա առաջ փակ են, նրան այլևս չեք տեսնի։ Ինչո՞ւ, Ձեր տեղը կիմանաք, դեսպանի ձեր պարտականությունը կիմանաք, կիմանաք, թե ինչպես է աշխատում դեսպանը։ Եթե սա չսովորեք, չեք կարող ներս մտնել»,- հայտարարել է Էրդողանը։
Հավելենք, որ օրերս Թուրքիայում ԱՄՆ դեսպան Ջեֆ Ֆլեյքը հանդիպել էր մայիսի 14-ին կայանալիք նախագահական ընտրություններում ընդդիմության (6 ընդդիմադիր կուսակցությունների դաշինք) միասնական թեկնածու, Ժողովրդահանրապետական կուսակցության նախագահ Քեմալ Քըլըչդարօղլուի հետ։
«Դեսպան Ֆլեյքը հանդիպել է CHP-ի նախագահ Քեմալ Քըլըչդարօղլուին՝ մեր երկու երկրների միջև փոխադարձ հետաքրքրություն ներկայացնող հարցերի շուրջ թուրքական քաղաքական կուսակցությունների հետ շարունակվող զրույցների շրջանակում։ Դեսպանն ԱՄՆ-ի համերաշխությունն ու ցավակցությունն է հայտնել Թուրքիայի երկրաշարժի կորուստների կապակցությամբ»,- հայտնել էր ԱՄՆ դեսպանատունը թվիթերյան գրառմամբ։
Էմմա Չոբանյան
