Էրդողանի ելույթից հետո ընդդիմադիր կուսակցության գրասենյակը հարձակման է ենթարկվել

Անհայտ անձը կամ անձինք այսօր առավոտյան զինված հարձակում են գործել ընդդիմադիր İYİ (Լավ) կուսակցության Ստամբուլի նահանգային գրասենյակի վրա։ Փամփուշտներից մեկը դիպել է պատուհանին, գրում է Duvar-ը։

Ոստիկանությունը հետաքննում է Ստամբուլի եվրոպական մասում՝ Մերթերում գտնվող շենքի վրա հարձակումը։

Նշվում է, որ կուսակցության նախագահ Մերալ Աքշեները Ստամբուլի քաղաքապետ Էքրեմ Իմամօղլուի հետ պետք է Ղազիօսմանփաշայում՝ Մերթերից մոտ տասը կիլոմետր հեռավորության վրա մասնակցեր միջոցառման։ Աքշեներն ու Իմամօղլուն նախատեսված հանդիպման փոխարեն հայտարարություն են արել İYİ կուսակցության գրասենյակում։

«Այն մարդը, որը կվախեցնի Մերալ Աքշեներին, դեռ չի ծնվել, ես չեմ վախենում, պարո՛ն Ռեջեփ։ Կանա՛յք, ես կոչ եմ անում ձեզ՝ բոլոր տեսակի վիրավորանքները, կեղտը, զզվանքը, որ չի կարելի անել տղամարդ քաղաքական գործչի նկատմամբ, արվել են իմ դեմ, քանի որ ես կին եմ։ Եթե ցանկանում եք վերջ տալ այս դաժանությանը, կեղտոտությանը և զզվանքին, սիրելի՛ կանայք, մայիսի 14-ին քվեարկեք «Ազգային դաշինքի» օգտին։ Պարո՛ն Ռեջեփ, ես Ձեզ եմ դիմում։ Այս իշխանության ընթացքում չկար մի բան, որ ես չապրեի, բայց այս օրերը կանցնեն։ Աստծո կամոք մայիսի 15-ին արևը կբարձրանա»,- ասել է Աքշեները։

Հարձակումից առաջ «Լավ» կուսակցության առաջնորդ Մերալ Աքշեների և նախագահ Ռեջեփ Թայիփ Էրդողանի միջև հայտարարությունների պատերազմ էր եղել։ Պատճառը հետերկրաշարժյան շինարարական նախագծերի վերաբերյալ Աքշեների քննադատությունն է։

«Եթե ասում ենք մի բան կանենք, ապա կանենք, տիկի՛ն Մերալ, զգույշ եղեք մեր անվան հետ, անունս Թայիփ է, ազգանունս՝ Էրդողան։ Ուշադրություն դարձրեք։ Երբ խոսում եք, համապատասպան խոսեք»,- ասել էր Էրդողանը։

Էմմա Չոբանյան