Էրդողանը զանգահարել և հետապնդել է ՍԴ անդամներին՝ քրդամետ կուսակցության միջոցների սառեցման որոշումը չեղարկելու պատճառով

Թուրքիայի նախագահ Ռեջեփ Թայիփ Էրդողանն այս ամսվա սկզբին հեռախոսով զանգահարել է Թուրքիայի Սահմանադրական դատարանի որոշ անդամների՝ քրդամետ Ժողովուրդների դեմոկրատական կուսակցությանը (HDP) հատկացված պետական միջոցների սառեցումը չեղարկելու որոշման պատճառով։ Այս մասին հայտնել է Halk TV լրատվականը՝ վկայակոչելով բարձրագույն դատարանի անդամին, գրում է Turkish Minute-ը։

Հունվարին վիճահարույց որոշմամբ բարձրագույն դատարանը խորհրդարանի երկրորդ ամենամեծ ընդդիմադիր կուսակցությանը՝ HDP-ին զրկել էր ընտրությունների համար եկամտի հիմնական աղբյուրից՝ պատճառաբանելով, որ այն կապեր ունի ահաբեկչության հետ:

Դատարանը մարտի 9-ին ձայների մեծամասնությամբ բեկանել է որոշումը՝ կուսակցությանը թույլ տալով այս տարի ստանալ 539 միլիոն լիրա (29 միլիոն դոլար) գանձապետական ֆինանսավորում:

Բարձրագույն դատարանի անդամներից մեկը, որը քվեարկել է HDP-ի միջոցների սառեցումը հանելու օգտին, Halk TV-ին անանունության պայմանով հայտնել է, որ ինքը և մի քանի այլ անդամներ հեռախոսազանգ են ստացել Էրդողանից մարտի սկզբին կայացրած որոշման պատճառով։

«Ես հավատում էի ձեզ։ Ինչպե՞ս կարող էիք քվեարկել միջոցների սառեցումը հանելու օգտին»,- Էրդողանի խոսքերն է վկայակոչել ՍԴ անդամը։

Նա նշել է, թե Էրդողանին ասել է, որ հարցը գնահատում է իրավական տեսանկյունից և պարզվում է, որ Սահմանադրության մեջ կամ այլ օրենքներում չկան այնպիսի կարգավորումներ, որոնք արդարացնում են HDP-ի նկատմամբ կիրառված միջոցը։

«Նախագահն ասաց, որ որոշումը չի համապատասխանում օրենքին։ Երբ հարցն առաջին անգամ հայտնվեց դատարանում, ես չկարողացա որևէ այլ ճանապարհ գտնել՝ ի դեմս այն մեղադրանքի, որ գանձապետական միջոցներն ուղղակիորեն փոխանցվել են ահաբեկչական կազմակերպությանը: Այնուամենայնիվ, մենք այն ժամանակ տեսանք փաստաթղթերում, որ 2017-2018 թվականներին և դրան հաջորդող տարիներին փաստացի միջոցների փոխանցում չի եղել ահաբեկչական կազմակերպությանը»,- ասել է աղբյուրը։

Էրդողանի կառավարությունը 2021 թվականի մարտից փորձում է փակել քրդամետ կուսակցությունը՝ օրենքից դուրս քուրդ զինյալների հետ ենթադրյալ կապերի պատճառաբանությամբ: Թուրքիայի գլխավոր դատախազը 2021 թվականի մարտին քրեական գործ էր հարուցել կուսակցության դեմ՝ մեղադրելով նրան երկրում արգելված Քուրդիստանի աշխատավորական կուսակցության (PKK) հետ կապերի մեջ։

Էմմա Չոբանյան