14.12.2025 | 14:02
Մառախուղ, քամու ուժգնացում․ օդի ջերմաստիճանը կնվազի
Իլոն Մասկն ու 1000-ից ավելի գիտնականներ կոչ են արել անհապաղ դադարեցնել ահեստական բանականության փորձարկումը՝ մարդկության համար ռիսկերի պատճառով
Քաղաքականություն
30.03.2023 | 23:09
SpaceX-ի և Tesla-ի գործադիր տնօրեն Իլոն Մասկը, Apple-ի համահիմնադիր Սթիվ Վոզնյակը, բարերար Էնդրյու Յանգը և արհեստական բանականության ավելի քան հազար այլ հետազոտողներ կոչ են արել անհապաղ դադարեցնել արհեստական բանականության վրա հիմնված համակարգերի ուսումնասիրությունը՝ «ավելի հզոր, քան OpenAI-ի GPT-4»-ը: Այս մասին ասվում է Future of Life ոչ առևտրային կազմակերպության կայքում հրապարակված նամակում։
Նամակի հեղինակները մատնանշել են «մարդու հետ մրցունակ ինտելեկտով» արհեստական բանականության համակարգերի հետագա զարգացման պատճառով մարդկության համար ռիսկերը։ Նրանք կոչ են արել 6 ամսով ամբողջությամբ դադարեցնել արհեստական բանականության ցանկացած համակարգի ուսուցումը։
«Արհեստական բանականության հզոր համակարգերը պետք է մշակվեն միայն այն դեպքում, երբ մենք համոզված լինենք, որ դրանց ազդեցությունը դրական կլինի, իսկ դրանց ռիսկերը՝ կառավարելի»,- ասված է նամակի տեքստում։
Ուղերձի տակ ստորագրել են նաև Pinterest-ի համահիմնադիր Էվան Շարփը, Ripple-ի համահիմնադիր Քրիս Լարսենը, Stability AI-ի գործադիր տնօրեն Էմադ Մոստակը, ինչպես նաև DeepMind, Harvard, Oxford և Cambridge համալսարանների հետազոտողները:
Նամակում նկարագրվում է հանրության և քաղաքակրթության համար չափազանց խելացի արհեստական բանականության համակարգերի կողմից հնարավոր ռիսկերը։
«Պե՞տք է մենք, արդյոք, զարգացնենք «ոչ մարդկային ուղեղները», որոնք վերջնական արդյունքում կարող են մեզ գերազանցել թվաքանակով, մեզ խորամանկել ու փոխարինել։ Պե՞տք է մենք, արդյոք, վտանգենք մեր քաղաքակրթության վրա մեր վերահսկողության կորուստը։ Նման որոշումները չպետք է պատվիրակել չընտրված տեխնոլոգիական առաջնորդներին»,- եզրափակել են նամակի հեղինակները։
Ավելի վաղ ամերիկյան Goldman Sachs բանկի վերլուծաբանները կանխատեսել էին, որ առաջիկա 10 տարում շուրջ 300 միլիոն աշխատատեղ կվերանա համաշխարհային աշխատաշուկայից արհեստական բանականության պատճառով։
Տաթև Ֆռանգյան
