«Մանվելը Սերժ Սարգսյանի հրաժարականի հաջորդ օրը ուրացավ Հանրապետականին, մի քանի օր հետո էլ ՀՀԿ-ն ուրացավ իրեն»․ Վարդան Մալխասյան. ՏԵՍԱՆՅՈՒԹ

ՀԱԿ վարչության անդամ, նախկին ազատամարտիկ Վարդան Մալխասյանը Factor.am-ի հետ զրույցում հիշեցնում է, որ ԵԿՄ կառույցի իրական վարկաբեկումը սկսվեց 1999 թվականի հոկտեմբերի 27-ից հետո, երբ «Վազգենի դիակի վրա» Ռոբերտ Քոչարյանը սկսեց առևտուր անել, պաշտոններ ու բիզնեսներ տվեց իր դեմ ելած ԵԿՄ-ականներին՝ այդ թվում Անդրանիկ Մարգարյանին ու Մանվել Գրիգորյանին, իսկ դրանից հետո ԵԿՄ վերնախավը դարձավ իշխանահաճո ու կտրուկ հարստացավ։ «Նյութապաշտությունը բերում է միշտ էս հետևանքներին, ոսկու ու փողի հետևից վազողները միշտ խորտակվում են»,- ասաց նախկին ազատամարտիկը։

Նա նաև չի կարծում, որ հնարավոր է այլևս ԵԿՄ-ն վերակենդանացնել․ «Կարծում եմ, չի ստացվի, որովհետև ԵԿՄ-ականներն արդեն 60-անց են։ Ավելի լավ կլիներ, ԵԿՄ-ն դառնար հասարակական ակումբ, որտեղ կրթեին նոր սերնդին»։  

Միևնույն ժամանակ Վարդան Մալխասյանը կարծում է, որ չնայած տարիներ շարունակ իրականացված առևտրին, և նրան, որ բազմաթիվ ազատամարտիկներ լքել են կառույցը, ԵԿՄ-ում այսօր կան իսկական հերոսներ։ «ԵԿՄ-ում կան մարդիկ, որոնք նվիրական են եղել, բայց միշտ անտեսվել են, մնացել են չքավոր, սոված ու անտեր»,- նշեց Մալխասյանը։

ՀԱԿ անդամին հիշեցրինք, որ 2008 թ.-ին Լևոն Տեր-Պետրոսյանը կարևորում էր գեներալ Մանվելի միացումը համազգային շարժմանը՝ իմանալով նրա նախկին պահվածքի մասին, և այդպիսով ներդրում ունեցավ նրա կերպարի կարևորմանն ու կայացմանը։ «Լևոն Տեր-Պետրոսյանն այն ժամանակ էլ գիտեր, որ Մանվելը բարի պտուղ չի, բայց քանի որ շատ աջակիցներ չուներ… Մի խոսք կա, եթե նպատակդ ազնիվ է, հայրենասիրական է, միջոցների առաջ տարբերություն չեն դնում։ Ինքը մտածում էր, թե եթե Մանվելն էր որպես ռազմականացված թև գա հեղափոխության կողմը․․․, և իրոք, եթե գար, հեղափոխությունը կհաղթեր։ Եթե Մանվելն այդ ժամանակ գար, միանար Լևոն Տեր-Պետրոսյանին, գուցե մաքրագրեր իր անցյալը»,- մեկնաբանեց ՀԱԿ անդամը։

Նա մատնանշեց Նիկոլ Փաշինյանի համաձայնության կառավարությունը․ «Հիմա Նիկոլը, որ եկել է իշխանության, հենվել է մարդկանց վրա, որոնք խայտառակ կենսագրություն ունեն՝ Դաշնակցությունն ու շատ կան տենց ուժեր և «Ծառուկյան» խմբակցության մեջ, բայց ինքը քանի որ վեհ նպատակներ ունի, դեռ չի հասել իր ուզած կետին, ուզած-չուզած պիտի հենվի սրանց վրա»։

Ինչ վերաբերում է ՀՀԿ-ական Առաքել Մովսիսյանին ԱԱԾ տանելու ու ազատ արձակելու հանգամանքին, Վարդան Մալխասյանն ասաց, թե նա դեռ պետք է պատասխան տա 2014 թ-ին ՀԱԿ պատգամավոր Արամ Մանուկյանի դաժան ծեծը պատվիրելու համար։ «Դեռ շատ հանցագործություններ կան, որ պիտի մեջտեղ բերվեն։ Մեր Արամ Մանուկյանին դաժան ծեծի ենթարկեցին, և ինքն էր պատվիրել էդ հանցագործին։ Շմայսը նրա հետ պայմանավորվել էր, որ եթե Արամ Մանուկյանին ծեծի, ինքը դատարանի հետ կխոսի ու պատիժը կհանեն, այդպես էլ եղավ։ Էդ մարդը պիտի ամենաքիչը 10 տարի նստեր, որովհետև դեպուտատին դաժան ծեծի էր ենթարկել, բայց վերջում տուգանեցին»,- հիշեցրեց ՀԱԿ անդամը։

Անդրադառնալով նախկին իշխանության ներկայացուցիչների՝ իրենց նախկին ղեկավարներին այսօրվա «ուրացումներին», Մալխասյանն ասաց․ «ՀՀԿ-ում հայտնված բարձր դեմքերը մազաչափ անգամ գաղափարական կեցվածք չունեն և բնական է՝ պետք է ուրանային։ Մանվելը Սերժ Սարգսյանի հրաժականի հաջորդ օրը ուրացավ Հանրապետականին, մի քանի օր հետո էլ ՀՀԿ-ն ուրացավ իրեն»։

Մանրամասները դիտեք Վարդան Մալխասյանի հետ Factor.am-ի հարցազրույցում։

Մարինե Խառատյան