Նախաձեռնելու եմ  «Սասնա ծռերի» և զոհված ոստիկանների ընտանիքների  հաշտեցում. Եղիշե Պետրոսյան. ՏԵՍԱՆՅՈՒԹ

«Մեր իրականության մեջ հարյուրավոր մանվելգրիգորյաններ կան, բարձրաստիճան պաշտոնյաներն էլ անհնար է, որ տեղյակ չլինեին գեներալի կամ մյուսների  արարքների մասին: Տարիներ շարունակ մենք այդ մասին էինք աղաղակում, և ինձ համար անհասկանալի է, թե ինչու են մարդիկ այսօր շոկի մեջ ընկել»,-Factor.am-ի հետ զրույցում նման տեսակետ հայտնեց երգահան, երաժիշտ Եղիշե Պետրոսյանը:

Նրա խոսքով՝ ԱԱԾ-ն այսօր անում է այն, ինչ պետք է արած լիներ հենց ինքը, պետք է արած լինեին  քննչական մարմինները, դատախազությունը եւ այլն. «ԱԱԾ-ի գործողություններից ապշելը նույնն է, թե զարմանանք, որ բժիշկը վիրահատեց հիվանդին, և նա չմեռավ: Չէ՞ որ հենց դա է իր գործը: Նախկինում ԱԱԾ-ն երկրի անվտանգության համար բացարձակապես մտահոգ չի եղել, փոխարենն օգտագործել է իր ուժային հնարավորությունները՝ գողական, այլանդակ պետությանը սպասարկելու համար: Դրան մեղսակից են եղել դատախազությունը, ոստիկանությունը, բոլորը»:

Պարոն Պետրոսյանի համոզմամբ՝ լուրջ արդյունքների հասնելու համար հարկավոր են աստիճանական քայլեր. «Հիմա կառավարությունը ձեռնամուխ է եղել ախոռները մաքրելու գործին: Առանց դրա՝ հնարավոր չէ անցնել հաջորդ էտապին: Սնանկ և անկառավարելի երկրի վտանգները վերացնելու փուլն է: Դրանից հետո պետք է դատարկված երկրի գանձարանը հնարավորինս լցնել, ապա  կարելի է մտածել ժողովուրդ դաստիարակելու մասին»:

Երգահանը վստահ է, որ այս հեղափոխությունը տարիներ շարունակ պայքարող մարդկանց տառապանքի, կորուստների  երկունքն է. «Սասնա Ծռերն էլ դրանից անմասն չմնացին: Ցավոք, այդ ընթացքում եղան նաև զոհեր:  Բայց այդ կորուստները եղան հայրենիքակործան համակարգի ընդվզման ժամանակ: Ամեն դեպքում,  նախաձեռնելու եմ  Սասնա Ծռերի և զոհված ոստիկանների ընտանիքների  հաշտեցում, ես կգնայի այդ ճանապարհով: Պետք է ընդունել, որ բոլորս եղել ենք ինչ-որ իրավիճակի զոհ: Սասնա Ծռերից էլ կային վիրավորներ, կարող էին նաև զոհեր լինել: Ծանր է, բայց պետք է հանգենք հանդուրժողականության մթնոլորտի: Չպետք է թույլ տանք, որ մեկիս մյուսիս դեմ հանեն»:

Մանրամասները՝ տեսանյութում:

Աննա Բաբաջանյան