Քաղաքականություն
24.03.2023 | 20:51
«Ամեն ինչ կանեմ իրավիճակը՝ կարգավորելու և ազգի պառակտումը վերացնելու համար, քանի որ մենք ընտանիք ենք»։ Իսրայելի վարչապետ Բենիամին Նեթանյահուն այսպես է դիմել ժողովրդին մի քանի ժամ անց այն բանից հետո, երբ իր խորհրդարանական կոալիցիան ընդունել է դատաիրավական բարեփոխումների շրջանակում օրենքների շարքից առաջինը, գրում է Euronews-ը:
Այժմ միայն վարչապետը կամ կառավարությունը կկարողանան հայտարարել Իսրայելի ղեկավարի՝ իր պարտականությունները կատարելու անկարողության մասին՝ պայմանով, որ նախարարների 2/3-ը կողմ քվեարկի այդ առաջարկին։ Նման որոշում Կնեսեթը կարող է ընդունել 120 պատգամավորներից 90-ի աջակցությամբ։
Միևնույն ժամանակ, իր կոչում Նեթանյահուն հստակ չի ասել, թե ինչպես է մտադիր «վերացնել ազգի պառակտումը», եթե հրաժարվում է սառեցնել դատական բարեփոխումները։
«Կարծում եմ՝ հնարավոր է իրականացնել այնպիսի բարեփոխում, որը պատասխան կտա երկու կողմերին էլ։ Բարեփոխում, որը կվերականգնի ճիշտ հավասարակշռությունն իշխանության թևերի միջև, իսկ մյուս կողմից՝ կպահպանի, և ես կասեի, որ ոչ միայն կպահպանի, այլև կընդգծի երկրի յուրաքանչյուր քաղաքացու անհատական իրավունքները»,- ասել է Նեթանյահուն։
Իսրայելի առաջնորդի լղոզված խոստումներն արագորեն մերժվել են բողոքի շարժման մասնակիցների կողմից, ովքեր հայտարարել են, որ կշարունակեն ընդդիմանալ «բռնապետ դառնալու՝ Նեթանյահուի փորձին»:
Ցուցարարները փակել են երթևեկությունը հիմնական մայրուղիներով, շարունակվող անկարգությունների ընթացքում բախումներ են գրանցվել ոստիկանների հետ։ Ոստիկանությունը ջրցան մեքենաներ է կիրառել ամբոխը ցրելու համար, տասնյակ մարդիկ, այդ թվում՝ բողոքի շարժման առաջնորդներ, բերման են ենթարկվել։
Հիշեցնենք, որ Իսրայելում դատական համակարգը փոխելու՝ կառավարության ծրագիրը երկիրը ներքաշել է ամենածանր ներքին ճգնաժամերից մեկի մեջ:
Տաթև Ֆռանգյան
