08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Human Rights Watch-ը Թուրքիային կոչ է անում հետաքննել Սիրիայում Նովրուզի ընթացքում խաղաղ բնակիչների սպանությունը
Քաղաքականություն
23.03.2023 | 22:43
Human Rights Watch-ը հայտարարություն է տարածել այն մասին, որ Սիրիական ազգային բանակի զինված խմբավորման երեք անդամներ Աֆրինի Ջինդերիս քաղաքում Նովրուզի տոնակատարության ժամանակ սպանել են նույն ընտանիքից չորս խաղաղ բնակիչների, գրում է Bianet-ը։
«Թուրքիայի աջակցությունը վայելող Սիրիական ազգային բանակին (SNA) պատկանող զինված խմբավորման երեք անդամներ 2023 թվականի մարտի 20-ին կրակ են բացել քուրդ ընտանիքի վրա Սիրիայի հյուսիսում գտնվող Ջինդերիս քաղաքում, երբ նրանք տոնում էին Նովրուզը՝ քրդական Նոր տարին»,- ասվում է Human Rights Watch (HRW) հայտարարության մեջ:
Կազմակերպությունը կոչ է արել Թուրքիային անկախ և թափանցիկ հետաքննություն սկսել այդ իրադարձության հետ կապված։
Human Rights Watch-ի Մերձավոր Արևելքի բաժնի փոխտնօրեն Ադամ Քուգլն ընդգծել է, որ այս սպանությունները տեղի են ունենում «թուրքական ուժերի և նրանց կողմից լիազորված տեղական սիրիական խմբավորումների կողմից մարդու իրավունքների անհասցե խախտումներից հետո»:
«Թուրքիան թույլ է տվել այս մարտիկներին անպատիժ բռնության ենթարկել իրենց վերահսկողության տակ գտնվող տարածքներում ապրող մարդկանց»,- ասել է Քուգլը:
Նշվում է, որ HRW-ը զրուցել է սպանված եղբայրներից մեկի հարազատների, հանցագործության երկու ականատեսների, հարևանի և տեղացի մարդասիրական աշխատակցի հետ Ջինդերիսի մոտակայքում գտնվող Աֆրին քաղաքում, ինչպես նաև ուսումնասիրել է մարմինների լուսանկարներն ու տեսանյութերը, որոնք արվել են սպանությունից հետո։ Չորս զոհերը եղբայրներ են։ Ականատեսները և մարդասիրական աշխատողը հաստատել են, որ գրոհայինները եղել են Սիրիայի ազգային բանակի «Ջեյշ ալ-Շարքիյահ» խմբավորումից։
HRW-ի հայտարարության մեջ կոչ է արվում Թուրքիային հետաքննել սպանություններն ու ապահովել, որ մեղավորները պատասխանատվության ենթարկվեն։ Նշվում է նաև, որ Թուրքիան պետք է դադարեցնի աջակցությունը SNA խմբավորումներին, որոնք ներգրավված են մարդու իրավունքների կրկնվող կամ համակարգային և միջազգային մարդասիրական իրավունքի խախտումներում։
Էմմա Չոբանյան
