Ասում ենք՝ կա դասական, ժամանակակից երաժշտություն․ ո՛չ, իրականում կա լավ և վատ երաժշտություն․ ապաքաղաքական զրույց Արամ Սաթյանի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է Հայաստանի կոմպոզիտորների միության նախագահ Արամ Սաթյանը: Նրա կարծիքով՝ երիտասարդ կոմպոզիտորները պետք է լսեն սեփական սիմֆոնիկ ստեղծագործությունները կենդանի կատարմամբ, որպեսզի հստակեցնեն իրենց պատկերացումները երաժշտության այդ ժանրում: Թեև այսօր կոմպոզիտորների միությունը չունի այն նյութական հնարավորությունները, որոնք կային խորհրդային շրջանում, այնուամենայնիվ, իր կարևոր պարտականություններից մեկն է համարում նոր ստեղծագործությունների կատարման կազմակերպումը:

Արամ Սաթյանի համոզմամբ՝ կոմպոզիտորն «Աստծո մարդն» է, որովհետև նա լսում է վերևից եկող ձայները և դրանք բերում է ժամանակակից կյանք: Հաղորդման հյուրի կարծիքով՝ այն հանգամանքը, որ նախկինում երաժշտական ստեղծագործությունները հրապարակավ հնչելուց առաջ նախնական ընտրություն էին անցնում, ուներ իր դրական և բացասական կողմերը: Մի կողմից՝ դա նպաստում էր պրոֆեսիոնալիզմին, մյուս կողմից՝ կարող էր ստեղծագործական ազատությունը ճնշելու գործիք դառնալ:

Բոլոր դեպքերում, եթե անգամ երաժշտական գործը գրվում է սիրողի (ոչ մասնագետի) կողմից, միևնույն է, անցնում է պրոֆեսիոնալ երաժշտի ձեռքի տակով, գործիքավորվում է, շտկվում է, ապա նոր հնչում է լայն լսարանի համար:

Անդրադառնալով երաժշտություն ստեղծող համակարգչային ծրագրերին՝ կոմպոզիտորը կարծիք է հայտնում, որ հանդիսատեսի, լսարանի համար կարևոր է ոչ թե վարպետորեն սարքած գործը, այլ այն էմոցիաները, որոնք ստեղծագործողը ներդրել է երաժշտական երկի մեջ: Իսկ դա կարող է տալ միայն հոգի ունեցող մարդ արարածը:

Մանրամասները՝ տեսանյութում:

Արամ Աբրահամյան