15.08.2026 | 21:02
Վահան Կոստանյանը Զելենսկիին է փոխանցել ՀՀ բարձրագույն ղեկավարության շնորհավորանքները
Թուրքիայի քրդերը վճռական դերակատարում կունենան Էրդողանի դեմ ընտրություններում․ Euractiv
Քաղաքականություն
22.03.2023 | 22:53
Քրդերը, որոնք երկար ժամանակ իրենց թուրքական քաղաքականությունից դուրս էին զգում, կարող են վճռորոշ դեր ունենալ մայիսյան ընտրություններում, որոնք կորոշեն՝ արդյո՞ք նախագահ Ռեջեփ Թայիփ Էրդողանը կերկարաձգի պաշտոնավարումն ավելի քան երկու տասնամյակ իշխանությունից հետո, գրում է Euractiv-ը։
Հարցումները ցույց են տալիս, որ Էրդողանի իշխող դաշինքի և ընդդիմության միջև աջակցությունը հավասարակշռված է, քրդամետ Ժողովուրդների դեմոկրատական կուսակցությունը (HDP) պոտենցիալ վճռական նշանակություն կունենա։
Նախօրեին Դիարբեքիրում Նովրուզը նշող քրդերի շրջանում Էրդողանի հակառակորդները լավատես էին մայիսի 14-ի նախագահական և խորհրդարանական ընտրություններում նրա պարտությունն ապահովելու իրենց հնարավորությունների վերաբերյալ։
«Մենք ակնկալում ենք, որ ռեժիմը կգնա, և մենք կպայքարենք դրա համար։ Մենք մեծ հույսեր ենք կապում ընտրությունների հետ։ Մեր ժողովուրդները միասին են կանգնած իրենց բոլոր գույներով»,- ասել է 36-ամյա քաղաքական ակտիվիստ Զեյնեփ Դիյարը։
Ահագնացող գնաճը և հանրային քննադատությունը կառավարության կողմից փետրվարին տեղի ունեցած ավերիչ երկրաշարժին արձագանքի վերաբերյալ Էրդողանին և նրա իշխող «Արդարություն և զարգացում» կուսակցությանը կանգնեցրել են ամենածանր ընտրական մարտահրավերի առաջ։
Բացի այդ, երկար տարիներ Էրդողանը սիրաշահում էր քրդերին, որոնք կազմում են Թուրքիայի բնակչության մոտ 20%-ը, աջակցություն ստանալով հիմնականում քրդական հարավ-արևելքում՝ քրդերի իրավունքները խթանելու, տնտեսական առաջընթացի և քուրդ զինյալների հետ հակամարտությունը վերջ տալու քայլերով:
Սակայն Էրդողանը վաղուց քրդամետ Ժողովուրդների դեմոկրատական կուսակցությունը (HDP) ներկայացնում է որպես օրենքից դուրս գործող Քուրդիստանի աշխատավորական կուսակցության (PKK) քաղաքական ճակատ և ձգտում է արգելել այս քաղաքական ուժի գործունեությունը։
«Մեր պահանջն ազատությունն ու իրավահավասարությունն է», – ասել է Դիյարը գարնանային տոնակատարությունների ժամանակ՝ հավելելով, որ ինքը կքվեարկի ընդդիմության թեկնածու Քեմալ Քըլըչդարօղլուի օգտին, եթե HDP-ն որոշի համախմբվել նրա թիկունքում։
Սոցիոլոգիական հարցումները ցույց են տալիս, որ HDP-ին աջակցում է ընտրողների ավելի քան 10%-ը, և դա կարող է առանցքային դեր խաղալ քվեարկության ժամանակ, որը կորոշի, թե ով կառաջնորդի Թուրքիան։
HDP-ն՝ խորհրդարանի երրորդ ամենամեծ կուսակցությունը, ցանկանում է, որ ընդդիմությունը պաշտպանի քրդերի իրավունքների և այլ խնդիրների շուրջ պահանջները: Քրդական կուսակցությունը երկուշաբթի բանակցություններ է վարել Քըլըչդարօղլուի հետ, և սպասվում է, որ կսատարի նրա թեկնածությունը։
Էմմա Չոբանյան
