08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Թուրքական ոստիկանությունը Դիարբեքիրում շուրջ 200 մարդու է ձերբակալել Նովրուզի տոնակատարության ժամանակ
Քաղաքականություն
22.03.2023 | 21:38
Թուրքական ոստիկանությունը հիմնականում քրդաբնակ Դիարբեքիրում շուրջ 200 մարդու են ձերբակալել Նովրուզի տոնակատարության ժամանակ, գրում է Turkish Minute-ը։
Նովրուզը քրդերի կողմից ավանդաբար գունագեղ տոնակատարություններով նշվում է մարտի երկրորդ կեսին՝ որպես գարնան առաջին օր, երկրի հիմնականում քրդաբնակ հարավ-արևելքում: Այնուամենայնիվ, քրդերի համար խորհրդանշական նշանակություն ունեցող տոնակատարությունները հաճախ խաթարվում են ոստիկանության կոշտ միջամտությամբ:
Այս տարի նույնպես Նովրուզի տոնակատարությունները բացառություն չեն եղել։ Հսկայական բազմություն է հավաքվել Դիարբեքիրի Բաղլար թաղամասի Նովրուզ այգում մի քանի օր առաջ մեկնարկած տոնակատարությունների եզրափակիչ միջոցառմանը։ Այգում մեծ թվով ոստիկաններ են տեղակայված եղել հատուկ տարածքում, որն առանձնացված է եղել մետաղական պարիսպներով մասնակիցների և հարթակի միջև, որտեղ ելույթներ են հնչել:
Նշվում է, որ տոնակատարության մասնակիցների թվում են եղել բանտարկված քուրդ քաղաքական գործիչ Սելահաթթին Դեմիրթաշի կինը՝ Բաշաք Դեմիրթաշը, Ֆերիթ Շենյաշարը, ում ընտանիքի երեք անդամները սպանվել են իշխող «Արդարություն և զարգացում» կուսակցության պատգամավորի հետ կապ ունեցող անձանց կողմից 2018 թվականին, և Դիարբեքիրի նախկին քաղաքապետ, ներկայում բանտարկված Սելջուկ Միզրաքլիի կինը՝ Զեյնեփ Միզրաքլին։
Ոստիկանները տոնի մասնակիցներին թույլ չեն տվել մտնել տարածք։ Իրավապահները պղպեղի սփրեյ են օգտագործել՝ ցրելու տոնի մասնակիցներից մի քանիսին, երբ նրանք վիճել են տարածքում կանգնեցված բարիկադների հետ կապված:
Թեև ձերբակալվածների հստակ թվի մասին պաշտոնական հայտարարություն չկա, փաստաբանները նշում են, որ նրանց թիվը շուրջ 200 է:
Հավելենք, որ ավելի վաղ Ստամբուլում Նովրուզի տոնակատարության ժամանակ ոստիկանությունը 200-ից ավելի մարդու էր ձերբակալել։
Էմմա Չոբանյան
