Թուրքիան մասնակիորեն վերսկսել է պատժամիջոցների տակ գտնվող ապրանքների տարանցումը Ռուսաստան

Թուրքիան մասնակիորեն վերսկսել է պատժամիջոցների տակ գտնվող ապրանքների տարանցումը դեպի Ռուսաստան, սակայն մի շարք սահմանափակումներով։ Մասնավորապես, անհնար է մատակարարել ապրանքներ Կանադայից և ԱՄՆ-ից, ինչպես նաև ապրանքների որոշակի կատեգորիաներ։ Այս մասին գրում է «Կոմերսանտ»-ը՝ վկայակոչելով շուկայի մասնակիցներին, փոխանցում է «Իզվեստիա»-ն։

«Ուրբաթ օրվանից Թուրքիայում գործակալները հայտնում են, որ տարանցիկ մաքսազերծման համակարգը սկսել է աշխատել»,- ասել է KBT մաքսային և լոգիստիկ բրոքերային կազմակերպության նախագահ Յուլիա Շլենսկայան:

Նա, սակայն, նշել է, որ որոշ թուրքեր շարունակում են շահարկել պատժամիջոցների տակ գտնվող ապրանքների թեման:

AKFA-ի կոմերցիոն տնօրեն Ալեքսեյ Չերնիշևը նույնպես լրատվականի հետ զրույցում հաստատել է, որ իրենք սկսել են բեռների վերամշակումը անցյալ ուրբաթ, բայց դա չի վերաբերում բոլոր ապրանքներին։

F+tech-Marvel խմբում էլ ասել են, որ խնդիրների մեծ մասը շտկվել է։ Լրատվամիջոցի զրուցակցի խոսքով՝ «ինչպես արտահանվող ապրանքները, որոնց հետ ընդհանրապես խնդիրներ չեն եղել, այնպես էլ տարանցիկ ապրանքներն ուղարկվում են նորմալ ռեժիմով»։

Նախօրեին էլ սև ու գունավոր մետաղների Ստամբուլի ասոցիացիայի նախագահ Չեթին Թեքդելիօղլուն Reuters-ին ասել է, որ Թուրքիայի կառավարությունն ընկերություններին տվել է ապրանքների ցանկ, որոնք արգելված է արտահանել Ռուսաստան։ Սա վերաբերում է ցանկի ցանկացած ապրանքի՝ անկախ նրանից, թե որ երկրից է այն:

Էմմա Չոբանյան