16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Միջազգային քրեական դատարանի որոշումները ՌԴ-ի համար նշանակություն չունեն․ Զախարովան՝ Պուտինին ձերբակալելու՝ Հաագայի դատարանի որոշման մասին
Քաղաքականություն
17.03.2023 | 21:30
Միջազգային քրեական դատարանի որոշումները ոչ մի նշանակություն չունեն մեր երկրի համար, այդ թվում՝ իրավական տեսանկյունից։ Այս մասին իր Տելեգրամ-ալիքում գրել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Հաագայի միջազգային դատարանի որոշումը Վլադիմիր Պուտինի և ՌԴ երեխաների իրավունքների հանձնակատար Մարիա Լվովա-Բելովայի ձերբակալության մասին։
«Ռուսաստանը Միջազգային քրեական դատարանի Հռոմի ստատուտի կողմ չէ և որևէ պարտավորություն չի կրում դրանով։ Ռուսաստանը չի համագործակցում այդ մարմնի հետ, և Արդարադատության միջազգային դատարանից եկող ձերբակալության հնարավոր «բաղադրատոմսերը» մեզ համար իրավաբանորեն առոչինչ են լինելու»,- հավելել է Զախարովան։
Հհիշեցնենք՝ Հաագայի միջազգային քրեական դատարանը Ռուսաստանի նախագահ Վլադիմիր Պուտինի, ինչպես նաև ՌԴ երեխաների իրավունքների հանձնակատար Մարիա Լվովա-Բելովայի ձերբակալության միջազգային օրդեր է տվել, հաղորդում է BBC-ի ռուսական ծառայությունը։
«Այսօր՝ 2023 թվականի մարտի 17-ին, Միջազգային քրեական դատարանի երկրորդ նախաքննական պալատը Ուկրաինայում ստեղծված իրավիճակի համատեքստում երկու անձի՝ Վլադիմիր Պուտինի և Մարիա Լվովա-Բելովայի ձերբակալման օրդեր է տվել»,- ասվում է հաղորդագրության մեջ։
Միջազգային քրեական դատարանը պարզաբանել է, որ Պուտինը և Լվովա-Բելովան կասկածվում են ուկրաինացի երեխաներին ապօրինի արտաքսելու մեջ։ Հինգշաբթի ՄԱԿ-ի հետաքննող հանձնաժողովը հայտարարել էր, որ ուկրաինացի երեխաներին Ռուսաստան տեղափոխելը կարող է ռազմական հանցագործություն համարվել։
