06.06.2026 | 22:18
Երկրաշարժ Սպիտակ քաղաքից 11 կմ հարավ-արևելք
Աշխարհի 50 քաղաքական առաջնորդներ Էրդողանին կոչ են անում դադարեցնել ընդդիմադիր քրդական կուսակցության փակման գործը
Քաղաքականություն
14.03.2023 | 22:25
23 երկրների 50 քաղաքական առաջնորդներ բաց նամակով դիմել են նախագահ Ռեջեփ Թայիփ Էրդողանին՝ կոչ անելով դադարեցնել հարձակումներն ընդդիմադիր քրդամետ Ժողովուրդների դեմոկրատական կուսակցության (HDP) դեմ, գրում է Bianet-ը։
«Եթե Էրդողանի կառավարությունը լուծարի Ժողովուրդների դեմոկրատական կուսակցությունը (HDP), ապա դա կլուծարի նաև ժողովրդավարության հիմքերը Թուրքիայում»,- ասվում է առաջնորդների նամակում։
Քուրդիստանի աշխատավորական կուսակցության (PKK) հետ ենթադրյալ կապերի պատճառով կուսակցության դեմ գործը շարունակվում է արդեն մոտ երկու տարի։
Քաղաքական առաջնորդները նաև նշում են, որ կուսակցության հնարավոր փակումը ընտրություններից ամիսներ առաջ «խիստ վտանգի տակ է դնում երկրի ժողովրդավարությունը»:
Նամակը ստորագրողների թվում են NUPES-ի առաջնորդ Ժան-Լյուկ Մելենեխը, Մեծ Բրիտանիայի Լեյբորիստական կուսակցության նախկին առաջնորդ Ջերեմի Քորբինը, Հունաստանի ֆինանսների նախկին նախարար և MeRA 25 շարժման առաջնորդ Յանիս Վարուֆակիսը, լեզվաբան ու քաղաքական ակտիվիստ Նոամ Չոմսկին, Գերմանիայի Ձախ կուսակցության առաջնորդ Ջանի Վեսսելը, Ֆիլիպիններից գիտնական և քաղաքական գործիչ Վալդեն Բելլոն:
Գերմանիայի իշխող Սոցիալ-դեմոկրատական կուսակցությունն էլ Twitter-ում հաղորդագրություն է տարածել՝ աջակցություն հայտնելով HDP-ին։
«Մենք պահանջում ենք վերջ դնել քաղաքական դրդապատճառներով դատական գործին մեր քույր կուսակցության՝ HDP-ի գործունեությունն արգելելու համար։ Մենք մեր անցյալից գիտենք, որ դուք կարող եք արգելել մեր ինստիտուտները, բայց երբեք չեք կարող լռեցնել մեր գաղափարները՝ հանուն հավասարության, արդարության և ազատության»,- ասվում է գրառման մեջ։
Էմմա Չոբանյան
