05.11.2024 | 12:33
Հակոբ Սիմիդյանի ճեպազրույցը՝ ՈՒՂԻՂ
Ընտրություններում Էրդողանի մրցակից Քըլըչդաօղլուի աջակցությունն աճում է Թուրքիայի լայն ընդդիմության շրջանում․ Al Monitor
Քաղաքականություն
08.03.2023 | 23:30
Ապահովելով առաջադրումը որպես ընդդիմադիր դաշինքի նախագահի միասնական թեկնածու՝ Քեմալ Քըլըչդարօղլուն շնորհավորական ուղերձների ալիք է ստանում դաշինքից դուրս գործող ընդդիմադիր կուսակցությունների ղեկավարներից՝ բարձրացնելով մայիսին կայանալիք ընտրություններում ավելի լայն աջակցություն ստանալու հնարավորությունը, գրում է Al Monitor-ը։
Շաբաթավերջին քաղաքական առևտուրն ամրապնդեց «վեցի դաշինքն» այն բանից հետո, երբ ուրբաթ կոալիցիայի գլխավոր դեմքերից մեկը դեմ արտահայտվեց Քըլըչդարօղլուի թեկնածությանը: Ազգայնական «Լավ» կուսակցության առաջնորդ Մերալ Աքշեները խառնաշփոթ առաջացրեց ընդդիմադիր վեց կուսակցությունների դաշինքում, երբ դատապարտեց կենտրոնամետ Ժողովրդահանրապետական կուսակցության (CHP) առաջնորդ Քըլըչդարօղլուին՝ նրան մեղադրելով անձնական նկրտումները երկրի շահերին ստորադասելու համար։
Լրատվամիջոցը, սակայն, հավելում է, որ երկուշաբթի երեկոյան նա կանգնած էր Քըլըչդարօղլուի և չորս այլ առաջնորդների կողքին, երբ պաշտոնապես հայտարարվեց նրա թեկնածությունն առաջացրելու մասին: Հայտարարությունը ջերմորեն ողջունվել է ոչ միայն, այսպես կոչված, «վեցի սեղանը» կազմող կուսակցությունների կողմից, որը նաև հայտնի է որպես «Ազգային դաշինք», այլ նաև դաշինքից դուրս գտնվող ընդդիմադիր առաջնորդների կողմից:
Ամենանշանակալին քրդամետ Ժողովուրդների դեմոկրատական կուսակցության (HDP) հավանությունն էր՝ երկրի երկրորդ ամենամեծ ընդդիմադիր խմբավորումը Քըլըչդարօղլուի CHP-ից հետո: Կուսակցությունը, որն իր արմատներն ունի Թուրքիայի քրդական շարժման մեջ, մինչ այժմ հրաժարվում է ասել՝ արդյո՞ք կաջակցի «վեցի դաշինքի» թեկնածուին:
Այնուամենայնիվ, Haberturk հեռուստաընկերությանը տված հարցազրույցում HDP-ի առաջնորդներից Միտհաթ Սանջարն ընդգծված կերպով բաց է թողել Քըլըչդարօղլուին աջակցության դուռը:
«Մեր նպատակը փոխզիջման հասնելն է, որը կապահովի ժողովրդավարական փոփոխություն։ Մեր հիմնական նպատակն է՝ այս երկիր բերել ժողովրդավարություն, խաղաղություն և արդարություն։ Սպասում ենք այս հարցերի քննարկմանը»,- ասել է նա։
Սանջարը նաև շնորհավորել է Քըլըչդարօղլուին առաջադրման կապակցությամբ և նրան հրավիրել բանակցությունների իր կուսակցության հետ։
HDP-ի միացյալ առաջնորդ Փերվին Բուլդանն ազդարարել է կուսակցության բաց մոտեցումը Քըլըչդարօղլուին աջակցելու հարցում:
«Մենք առաջիկա օրերին կվերագնահատենք նախագահական ընտրություններում առաջադրման մեր քաղաքականությունը՝ ըստ զարգացումների»,- ասել է նա կուսակցության պատգամավորների հետ հանդիպմանը։
Քրդամետ կուսակցության նախկին համանախագահ Սելահաթթին Դեմիրթաշը, որը շարունակում է ազդեցիկ գործիչ համարվել, չնայած ավելի քան վեց տարի է՝ բանտում է, նույնպես ասել է, որ HDP-ն կողջունի Քըլըչդարօղլուին բանակցությունների համար:
HDP-ի կողմից սատարումը, որն աջակցություն է ստանում քրդերից, կարող է վճռորոշ լինել մայիսի 14-ին կայանալիք նախագահական և խորհրդարանական ընտրություններում: 2019 թվականի տեղական ընտրություններում քրդերի աջակցությունը կարևոր նշանակություն ունեցավ այն հարցում, որ CHP-ն գրավեց այնպիսի խոշոր քաղաքներ, ինչպիսիք են Ստամբուլը ու Անկարան, նախագահ Ռեջեփ Թայիփ Էրդողանի «Արդարություն և զարգացում» կուսակցությունից։
Միայն HDP-ն չէ, որ ողջունել է Քըլըչդարօղլուի թեկնածությունը։ Թուրքիայի Աշխատավորական կուսակցության (TIP) ղեկավար Էրքան Բասը Թվիթերում շնորհավորել և հաջողություն է մաղթել նրա թեկնածության առաջադրման կապակցությամբ, որի օրինակին հետևել է նաև Ձախ կուսակցությունը։
Իսկ ահա Լեյբորիստական կուսակցության առաջնորդ Էրքումենտ Աքդենիզը ձախակողմյան Evrensel պարբերականին ասել է, որ «ավելի էական է դարձել նախագահական ընտրություններին գնալը մեկ ընդդիմադիր թեկնածուով»։
Ստամբուլի Սաբանջի համալսարանի քաղագիտության դոցենտ Բերք Էսենը նախազգուշացրել է ընդդիմության ներսում հնարավոր խնդիրների մասին՝ հաշվի առնելով, որ Աքշեները և նրա ղեկավարած «Լավ» կուսակցությունը «դժգոհ են իրադարձությունների զարգացումից»։
«Այժմ, երբ Քըլըչդարօղլուն հավանություն է ստացել փոքր պահպանողական կուսակցությունից, կկարողանա՞, արդյոք, աջակցություն ստանալ պահպանողական ընտրողներից, որոնցից ոմանք աջակցում են իշխող կուսակցությանը։ Դա կարևոր հարց է։ Դուք չեք կարող ընտրություններում հաղթել միայն CHP-ի և HDP-ի աջակցությամբ»,- ասել է Էսենը:
Էմմա Չոբանյան
