Թուրքական վավերագրական ֆիլմը բացահայտում է Էրդողանի կառավարության ոչ ադեկվատ արձագանքը հզոր երկրաշարժերին

Թուրքական վավերագրական ֆիլմը, որը ներառում է քաղաքական գործչի, երկու լրագրողների և ակտիվիստի հայտարարությունները, ընդգծում է Թուրքիայի նախագահ Ռեջեփ Թայիփ Էրդողանին և նրա ղեկավարած իշխող «Արդարություն և զարգացում» կուսակցությանն ուղղված քննադատությունը տեղի ունեցած խոշոր երկրաշարժերին վատ արձագանքելու համար, գրում է Turkish Minute-ը։

Փետրվարի 6-ին Թուրքիայում տեղի ունեցած ավերիչ երկրաշարժերից հետո Էրդողանն ու նրա կառավարությունը մեղադրվում էին որոնողափրկարարական աշխատանքները վատ համակարգելու, բավարար թվով մարդկանց մոբիլիզացնելու և թիմերի միջև համակարգման բացակայության մեջ, ինչը հանգեցրեց նրան, որ խաղաղ բնակիչներն ինքնուրույն էին փորձում իրենց հարազատներին փլատակների տակից հանել։

41 րոպեանոց վավերագրական ֆիլմը, որը վերնագրված է «Ճակատագրի պլանը», արտահայտություն, որը հաճախ օգտագործվում է Էրդողանի կողմից աղետների հետևանքով, որոնց համար նրա կառավարությունը մեղադրվում է նախապես նախազգուշական միջոցներ չձեռնարկելու համար, հրապարակվել է 140journos յութուբյան ալիքում։

Վավերագրական ֆիլմում ներկայացվում են դեպքեր, երբ երկրաշարժից տուժածները հարցնում են, թե որտեղ են կառավարության որոնողափրկարարական խմբերը, հատկապես Աղետների և արտակարգ իրավիճակների կառավարման գործակալության (AFAD) խմբերը՝ ասելով, որ նրանք շատ ուշ են ժամանել մարդկանց օգնելու համար:

«Կառավարության պատասխանը ո՛չ կոմպետենտ էր, ո՛չ ադեկվատ։ Մարդիկ մահացան բոլորի աչիք առաջ»,- ասել է լրագրող Մուրադ Աղիրելը։

Լրագրող Ֆաթիհ Ալթայլըն էլ ասել է, որ իր թիմը խնդրել է երկրաշարժից տուժած բոլոր քաղաքների ղեկավարներին տեղեկություններ տրամադրել իրենց քաղաքներում իրավիճակի և կարիքների մասին։ Սակայն միայն ընդդիմադիր կուսակցությունից Հաթայի քաղաքապետը չի վախեցել դա անել։

«Վախ կար. մարդիկ վախենում էին անգամ ասել, թե ինչ է կատարվել իրենց հետ։ Նրանք վախենում էին, թե որտեղ և ինչպես կասեն դա»,- ասել է Ալթայլըին՝ նկատի ունենալով իշխող ԱԶԿ-ի կողմից քննադատական լրատվամիջոցների նկատմամբ ճնշումները, մասնավորապես՝ 2016 թվականի հուլիսի 15-ի հեղաշրջման փորձից հետո:

Ընդդիմադիր «Հայրենիք» կուսակցության առաջնորդ, պատգամավոր Մուհարեմ Ինջեն, որը 2018 թվականի նախագահական ընտրություններում իր թեկնածությունն է առաջադրել Էրդողանի դեմ, քննադատել է նախագահին՝ երկրաշարժերից հետո զինվորականներին որոնողափրկարարական աշխատանքներին միանալը թույլ չտալու համար։ Նա նշել է, որ ավելի շատ վշտացած է հիմա, քան ընտրությունների գիշերը, երբ պարտվել է, քանի որ եթե հաղթեր ու դառնար նախագահ, ապա երկրաշարժերից անմիջապես հետո զորքերին կմոբիլիզացներ:

Թուրքիայի որոնողափրկարարական ասոցիացիայի (AKUT) համահիմնադիր և նախկին նախագահ Նասուհ Մահրուքին ընդգծել է, որ աղետների դեմ պայքարում որոնողափրկարարական աշխատանքները պետք է սկսվեին առաջին րոպեներից, և երկրաշարժից տուժած բոլոր քաղաքներում կային զորքեր, որոնք սպասում էին անհապաղ միանալու ջանքերին։

«Կառավարությունը պետք է ներգրավվեր իր ամբողջ հզորությամբ այսպիսի աղետներին։ Կառավարությունը լքել է ազգին։ Այդ շրջանի բնակիչները չեն կարողանա հաղթահարել իրենց ապրած տրավման»,- ասել է Մահրուքին։

Էմմա Չոբանյան