Հաղորդաշարեր
05.03.2023 | 21:02Factor TV-ի A-politic հաղորդաշարի հյուրն է Հայաստանի ազգային ֆիլհարմոնիկ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը: Նրա համոզմամբ՝ 1,5 միլիոն բնակչություն ունեցող Երևանում ֆիլհարմոնիայի 1400 տեղանոց դահլիճի լեփ-լեցուն լինելը մեծ նվաճում չէ: Եվ դեռ հարց է, թե այդ այցելուներից ովքեր են խորությամբ ընկալում կատարվող ստեղծագործությունները՝ դրա համար անհրաժեշտ է որոշակի պատրաստվածություն և փորձ: Այդ համատեքստում դիրիժորն անդրադառնում է համերգների ժամանակ բջջային հեռախոսների զանգերին և հանդիսատեսի նկարահանումներին, որոնք խիստ բացասաբար են ազդում թե՛ կատարման, թե՛ դահլիճում տիրող մթնոլորտի վրա:
Հաղորման հյուրի կարծիքով՝ 20 տարում համերգների լսարանի որակը, ընդհանուր առմամբ, ընկել է: Ըստ նրա՝ առաջ ավելի շատ էին կատարման նրբությունները հասկացող մարդիկ, որոնց կարծիքը կարևոր էր: Նվագախմբի կադրային կազմից Էդուարդ Թոփչյանն այս պահին գոհ է, չնայած որոշ ժամանակ անց խնդիրներ առաջանալու են՝ նոր սերունդը հաճախ զիջում է այսօր ելույթ ունեցող երաժիշտներին: Այդ խնդիրը մասամբ լուծվում է հրավիրված մասնակիցների ներգրավմամբ:
Անդրադառնալով երգացանկի ընտրությանը՝ դիրիժորը պատասխանում է այն քննադատությանը, թե չափից դուրս մեծ հակվածություն ունի գերմանական երաժշտության հանդեպ: Էդուարդ Թոփչյանը նշում է, որ դա որպես հաճոյախոսություն է ընդունում և ավելացնում է նաև իտալական ու ռուսական երաժշտությունը: Ըստ նրա՝ դասական երաժշտությունը եվրոպական արվեստ է: Հաղորդման հյուրը, մասնավորապես, հիշեցնում է, որ հայկական սիմֆոնիկ գործեր սկսեցին գրվել նախորդ դարի կեսերից: Այնպես որ, կարևորելով հայկական երգացանկը՝ ֆիլհարմոնիկ նվագախումբն առաջնահերթ է համարում եվրոպական արվեստի լավագույն նմուշների կատարումը:
Մանրամասները տեսանյութում:
Արամ Աբրահամյան
