Վրաստանի երեք ընդդիմադիր կուսակցություններ խոստանում են մեկ միլիոն ստորագրություն հավաքել ԵՄ-ին Թբիլիսիի անդամակցության կողմնակիցներից

Վրաստանի երեք ընդդիմադիր կուսակցություններ՝ «Գիրչի՝ ավելի շատ ազատություն», «Դրոա» և «Աղմաշենեբելիի ռազմավարությունը», պատրաստվում են մեկ միլիոն ստորագրություն հավաքագրել Եվրամիությանը Վրաստանի անդամակցության օգտին, գրում է Նովոստի Գրուզիան:

«Քարոզարշավի նպատակն է արտահայտել վրաց ժողովրդի կարծիքն այն մասին, որ Վրաստանն արժանի է լինել Եվրամիության և ՆԱՏՕ-ի անդամ, և ոչ մի կառավարություն չի կարող վերանայել այդ նպատակը»,- ասել է «Աղմաշենեբելիի ռազմավարություն» կուսակցության ղեկավար Գիորգի Վաշաձեն։

Նրա խոսքով՝ իշխանություններն օտարերկրյա գործակալների մասին օրենք ընդունելու և դրանով իսկ հասարակական կազմակերպություններին ու լրատվամիջոցներին խարանելու նախաձեռնությամբ հաստատեցին, որ ցանկանում են երկիրը տանել ռուսական ճանապարհով, և դրան պետք է դիմակայել։

Սա ընդդիմության միակ նախաձեռնությունը չէ՝ ի պատասխան օտարերկրյա գործակալների մասին օրենքի նախագծին, որն արդեն սկսել է քննարկվել խորհրդարանական հանձնաժողովներում։

«Միացյալ ազգային շարժումն» այսօր հայտարարել է, որ ստեղծում է ռուսական ազդեցության գործակալների ռեգիստր, իսկ «Հանուն Վրաստանի» կուսակցությունը խորհրդարանում գրանցել է «օկուպացված երկրի՝ Ռուսաստանի Դաշնության ազդեցությունից պաշտպանության մասին» օրենքի նախագիծը։

Ինչպես Վրաստանում, այնպես էլ միջազգային կազմակերպությունների քննադատության ալիքին ի պատասխան՝ իշխանությունները նշում են, որ օտարերկրյա գործակալների մասին օրենքի գաղափարը չի հակասում ժողովրդավարական սկզբունքներին, այլ ուղղված է արտերկրից ֆինանսավորման աղբյուրների թափանցիկությանը։

Տաթև Ֆռանգյան