16.04.2026 | 17:17
Հոկեյի Շվեյցարիայի հավաքականի գլխավոր մարզիչին հեռացրել են փաստաթղթեր կեղծելու համար
Ինքներս ենք ընտրելու՝ ով մեզ հոսանք մատակարարի․ Էլեկտրաէներգիայի շուկան կդառնա տելեկոմի պես․ Սեդա Շահինյան․ ՏԵՍԱՆՅՈՒԹ
Քաղաքականություն
02.03.2023 | 18:32
Սովորական բնակիչ-բաժանորդների համար էլեկտրաէներգիան Հայաստանում ունի հաստատուն գներ, առայժմ։ Շուտով դա փոխվելու է, առաջիկա տարիներին բնակիչները ստանալու են նոր առաջարկներ՝ տարբեր գներով։ Մինչ այդ, էլեկտրաէներգետիկայի շուկան ազատականացվում է ընկերությունների համար։ Այս ամենի մասին զրուցել ենք Հանրային ծառայությունները կարգավորող հանձնաժողովի անդամ Սեդա Շահինյանի հետ։
–Տիկի’ն Շահինյան, մինչ բնակիչների համար տարբեր առաջարկների ի հայտ գալը` զրույցը սկսենք նրանից, թե ինչ է առհասարակ նշանակում այս ազատականացումը, ինչո՞ւ ենք գնում դրան՝ հստակ փոխարժեքներ ունենալու փոխարեն։
-Էլեկտրաէներգետիկ համակարգում շուկայի ազատականացումը բնագավառի ռեֆորմ է, որին գնում է առաջադեմ աշխարհը։ Առաջադեմ երկրները կա՛մ իրականացրել, կա՛մ իրականացնում են այդ ռեֆորմը։
–Նախորդ տարի մեկնարկեց ծրագիրը, որով խոշոր ընկերություններն այն ժամանակ՝ կամավոր, իսկ հիմա՝ արդեն պարտադիր պետք է միանան ազատ շուկային։ Կարո՞ղ եք նշել ընկերություններ, որոնք արդեն միացել են։
-Այսօր 42 սուբյեկտ ունենք, որ գործում են ազատ շուկայում։ Մեզ բոլորիս հայտնի ընկերություններ են՝ «Արարատ Ցեմենտ», «Զանգեզուրի պղնձամոլիբդենային կոմբինատ», «Գեոպրոմայնինգ», «Վեոլիա»։ Ես խոշորներից թվեցի, բայց, բնականաբար, կան նաև ոչ խոշոր ընկերություններ, որոնք ազատ շուկայում են գործում՝ կա՛մ ինքնուրույն՝ որպես որակավորված սպառող, կա՛մ գործում են մատակարարների ու թրեյդերների խմբերում։
–Քննարկումների ժամանակ ամենամեծ խնդիրը հետևյալն էր․ ինչպե՞ս են սովորական բնակիչները, օրինակ, ատոմակայանի էժան էլեկտրաէներգիայի համար մրցակցելու խոշոր ընկերությունների հետ։
-Լավ հարց է, որովհետև բոլորին է դա մտահոգում, բայց ես ուզում եմ նկատի ունենանք, որ այդ մրցակցությունը, ըստ էության, տարբեր հարթություններում է տեղի ունենում։ Մեծածախ շուկայում ինձ և Ձեր համար մրցակցելու են մատակարարները։ Եվ իրենք շատ ավելի մասնագիտացած են իրենց պատրաստվածությամբ, իրենց փորձառությամբ, և ունենալու են այդ հնարավորությունը՝ հավասար պայմաններով մրցակցելու շուկայի այլ խոշոր խաղացողների հետ՝ հնարավորինս ձեռնտու պայմաններով ձեռք բերելու այդ հոսանքը։
Եվ այստեղ իրենք են սովորական բաժանորդին առաջարկելու և համոզելու։ Այսինքն՝ ուղղարկիորեն ես և Դուք չենք մրցակցելու ընկերությունների հետ։ Այդ մրցակցությունը մեր փոխարեն կատարելու են մեր մատակարարները։
–Այսինքն՝ մենք կարիք չունենք խորանալու մասնագիտական ամեն ինչի մեջ։
-Սովորական բաժանորդները, կարծում եմ, կարիք ունեն խորանալու և մասնագիտանալու նրա մեջ, թե իրենց ինչ առաջարկներ են արվելու։ Օրինակ, մենք այսօր օգտվում ենք տելեկոմ ծառայություններից, և ինքներս ենք որոշում՝ օգտվել այս կամ այն օպերատորի ծառայությունից։ Այսինքն՝ այնտեղ էլ մենք ընտրությունը պետք է կատարենք մատակարարների միջև։
Հարցազրույցն ամբողջությամբ՝ տեսանյութում։
Գարիկ Հարությունյան
