Թուրքիայի ընդդիմության երկու առաջնորդները համաձայնություն են եկել նախագահի միասնական թեկնածուի շուրջ

Թուրքիայի գլխավոր ընդդիմադիր Ժողովրդահանրապետական կուսակցությունը (CHP) և ազգայնական «Լավ» (IYI) կուսակցությունը համաձայնության են եկել նախագահական ընտրություններում միասնական թեկնածուով հանդես գալու շուրջ, գրում է Gercek News-ը։

Նշվում է, որ CHP-ի առաջնորդ Քեմալ Քըլըչդարօղլուի և IYI-ի առաջնորդ Մերալ Աքշեների՝ նախօրեին կայացած հանդիպումն ավարտվել է կոնսենսուսով։

Մինչ CHP-ն կողմ էր որպես նախագահի միասնական թեկնածու Քըլըչդարօղլուի առաջադրմանը, Աքշեները դիմադրում էր նրա թեկնածությանը՝ պնդելով, որ առաջադրվող թեկնածուն պետք է լինի հարցման արդյունքներով ընտրություններում հաղթելու որոշակի հավանականություն ունեցող անձ:

Թուրքիայում նախագահական և խորհրդարանական ընտրությունները սպասվում են ամենաուշը մինչև հունիսի 18-ը։

Վեց ընդդիմադիր կուսակցություններ, որոնց թվում են նաև CHP-ն և IYI-ն, միավորվել են Թուրքիայում խորհրդարանական համակարգը վերականգնելու համար և աշխատում են նախագահական ընտրություններում Ռեջեփ Թայիփ Էրդողանի դեմ միասնական թեկնածու առաջադրելու ուղղությամբ:

Վեց կուսակցությունների առաջնորդները մարտի 2-ին հանդիպելու են՝ որոշելու իրենց միասնական թեկնածուին: Ակնկալվում է, որ առաջնորդները թեկնածուի մասին կհայտարարեն հատուկ արարողությամբ նույն օրը կամ հանդիպումից մի քանի օր անց։

Բացի այդ, օրերս Քըլըչդարօղլուն հանդիպել էր իր կուսակցության խորհրդարանական խմբի անդամներին և ստացել պատգամավորների լիակատար աջակցությունը նախագահական ընտրություններին նախապատրաստվելու գործընթացում։ Հանդիպմանը ելույթ ունեցած բոլոր պատգամավորները կողմ են արտահայտվել որպես նախագահի թեկնածու Քըլըչդարօղլուի առաջադրվելուն։

Էմմա Չոբանյան