05.11.2024 | 13:29
Քննարկվել է «Մասդար»-ի նախագծում Հայաստանի կառավարությանը 15 % բաժնեմասի փոխանցումը
ԱՄՆ Պետդեպը կրկին մտագոհություն է հայտնել Ադրբեջանի իշխանությունների կողմից բանտարկված ակտիվիստ Հաջիևի գործի կապակցությամբ
Քաղաքականություն
28.02.2023 | 14:32
ԱՄՆ Պետքարտուղարության մամուլի խոսնակ Նեդ Փրայսը հերթական ճեպազրույցում կրկին անդրադարձել է Ադրբեջանում քաղբանտարկյալների, մասնավորապես՝ ակտիվիստ, իրավապաշտպան Բախտիյար Հաջիևի կալանավորմանը։
Պատասխանելով հարցին, որ Ադրբեջանի իշխանությունները ոչ միայն չեն հետևում կոչերին ու ազատ չեն արձակում Հաջիևին, այլև ևս երկու ամսով երկարաձգել են բանտարկությունը, Փրայսը նշել է, որ սա այն դեպքն է, որի շուրջ ուղղակիորեն համագործակցել են ադրբեջանցի գործընկերների հետ:
«Ամբողջ աշխարհում մենք խոսում ենք համընդհանուր իրավունքների մասին։ Վերադառնալով ճեպազրույցի ժամանակ ձեր գործընկերներից մեկի հարցին՝ արտահայտվելու ազատության իրավունքը համընդհանուր իրավունք է, այն չի վերաբերվում միայն որոշ երկրների ու երկրների միավորումների քաղաքացիներին։ Սրանք իրավունքներ են, սա սկզբունք է, որը վերաբերում է մարդկանց ամբողջ աշխարհում: Եվ ամեն անգամ, երբ մենք տեսնում ենք, որ համընդհանուր իրավունքը վտանգի տակ է՝ լինի դա համակարգված, թե կոնկրետ դեպքերով, մենք չենք վարանում բարձրաձայնել մեր մտահոգությունները: Մենք այդ մտահոգությունները բարձրաձայնել ենք հանրային կերպով, նաև բարձրացրել ենք մեր ադրբեջանցի գործընկերների հետ հանդիպմանը մասնավոր կերպով»,- ասել է Փրայսը։
Ավելի վաղ ԱՄՆ Պետքարտուղարությունը, ինչպես նաև ամերիկացի մի շարք սենատորներ կոչ էին արել Ադրբեջանի իշխանություններին՝ ազատ արձակել Հաջիևին։ Նման կոչով նույնիսկ հանդես է եկել ԱՄՆ նախկին պետքարտուղար Հիլարի Քլինթոնը։
Հիշեցնենք, որ դեկտեմբերի 9-ին «խուլիգանության» և «դատարանի նկատմամբ անհարգալից վերաբերմունքի» մեղադրանքով կալանավորված Հաջիևը հացադուլի մեջ է ավելի քան 50 օր և, ըստ տեղեկությունների, գտնվում է ծայրահեղ ծանր վիճակում։
Ի դեպ, նախօրեին էլ ադրբեջանցի իրավապաշտպանները հրապարակել էին երկրում քաղբանտարկյալների թարմացված ցուցակը։ Դրա համաձայն՝ Ադրբեջանում ներկայում 93 քաղբանտարկյալ կա։
Էմմա Չոբանյան
