16.08.2026 | 15:48
Համաշխարհային օվկիանոսի ջերմաստիճանը հասել է 2026 թվականի սկբից առավելագույն արժեքին․ Լևոն Ազիզյան
Արգենտինայի Հաղորդակցությունների պետական մարմնի (ENACOM) և Հայաստանի կարգավորող մարմնի միջև ստորագրվել է փոխըմբռնման հուշագիր
Քաղաքականություն
24.02.2023 | 12:22
Աշխատանքային այցով Արգենտինական Հանրապետությունում գտնվող Հեռուստատեսության և ռադիոյի հանձնաժողովի նախագահ Տիգրան Հակոբյանը փետրվարի 23-ին հանդիպել է Արգենտինայի Հաղորդակցությունների պետական մարմնի (ENACOM) նախագահ Կլաուդիո Ամբրոսինիի և մարմնի անդամների հետ․ տեղեկացնում են ՀՌՀ-ից։
Նախարարների կաբինետի վերադասության ներքո գործող ENACOM-ը հեռահաղորդակցությունների և տեսալսողական ծառայությունների կանոնակարգման և վերահսկման ինքանավար մարմին է, որի առաջնային նպատակներից է տեսալսողական հաղորդակցությունների և տեղեկատվական տեխնոլոգիաների ու հաղորդակցությունների կանոնակարգումը, վերահսկումն ու ֆինանսական վերահսկողությունը։
Զրույցի ընթացքում, որին ներկա է եղել Արգենտինական Հանրապետությունում ՀՀ արտակարգ և լիազոր դեսպան Հովհաննես Վիրաբյանը, ընդգծվել է տեսալսողական մեդիայի բնագավառում համագործակցության հաստատումից բխող երկկողմ շահավետությունը, քննարկվել՝ մի շարք նախագծեր, որոնց իրագործումը կնպաստի համագործակցության խթանմանն ու զարգացմանը։
Հանդիպման ավարտին Արգենտինայի Հաղորդակցությունների պետական մարմնի (ENACOM) և Հայաստանի կարգավորող մարմնի միջև ստորագրվել է փոխըմբռնման հուշագիր, որի նպատակը տեխնիկական և համակարգային համագործակցության հաստատումն է՝ հիմնված կողմերի միջև տեղեկատվության և լավագույն փորձի փոխանակման վրա։
Տ․ Հակոբյանը այցելելու է «Արգենտինական ռադիո և հեռուստատեսություն» պետական ընկերություն, հանդիպելու ընկերության նախագահ Ռոսարիո Լուֆրանոյի հետ, որի ընթացքում քննարկվելու են Արգենտինայի պետական հեռուստառադիոընկերության և Հայաստանի Հանրային հեռարձակողի միջև համագործակցության, հանրօգուտ հանդիսացող տեսալսողական նյութերի համատեղ արտադրման և տարածման հնարավորությունները:
Նախատեսված է ՀՌՀ նախագահի հանդիպումը Արգենտինայի և Ուրուգվայի հայկական լրատվամիջողների ղեկավարների հետ։
