22.06.2026 | 12:10
Մարտուն Գրիգորյանի որդին կալանավորվել է // 1 զոհ, 11 տուժած Արագածոտնում տեղի ունեցած վթարից․ ԼՈՒՐԵՐ
Բաքուն պնդում է, թե միջազգային գործընկերները, իբր, «կողմ են Լաչինի միջանցքում անցակետերի տեղակայմանը»
Քաղաքականություն
23.02.2023 | 17:30
Ադրբեջանի ԱԳ փոխնախարար Էլնուր Մամեդովն այսօր լրագրողների հետ ճեպազրույցում հայտարարել է, թե միջազգային գործընկերները, իբր, դրական են վերաբերվում Լաչինի միջանցքում անցակետերի տեղակայմանը։
Մամեդովը նշել է, թե Մյունխենի անվտանգության համաժողովում Ադրբեջանի նախագահն առաջարկել է սահմանային անցակետեր տեղակայել Լաչինի միջանցքում, լուրջ քայլեր ձեռնարկել երկու երկրների միջեւ վստահության ամրապնդման ուղղությամբ, ինչպես նաև ապահովել այս ճանապարհի թափանցիկ օգտագործումը՝ եռակողմ հայտարարության նպատակներին և նպատակներին համապատասխան»։
Ի դեպ, անցակետերի տեղադրումը հենց եռակողմ հայտարարության կոպիտ խախտում է։
«Արդյունքը, որ մենք ստացանք առաջին շփումներից, կայանում է նրանում, որ միջազգային գործընկերները դրական են վերաբերում այս առաջարկին և հասկանում են դրա էությունը։ Հայաստանից վերջին 2 տարվա ընթացքում Լաչինի ճանապարհի թափանցիկ օգտագործման և չարաշահման դեպքերը կանխելու դիրքորոշումը հասկանալի է։ Դժբախտաբար, այս առաջարկի վերաբերյալ Հայաստանի նախնական կարծիքը բավականին բացասական էր»,- ասել է Մամեդովը՝ չնշելով, թե միջազգային գործընկերներ ասելով՝ ում նկատի ունի։
ԵՄ-ն ու ԱՄՆ-ն մշտապես հանդես են եկել Լաչինի միջանցքն անհապաղ վերաբացելու անհրաժեշտության մասին հայտարարություններով։ Նման հայտարարություն ևս մեկ անգամ հնչեցրել է ԱՄՆ պետքարտուղար Էնթոնի Բլինքենը Հայաստանի և Ադրբեջանի ղեկավարների հետ հանդիպմանը։
Բացի այդ, Հայաստանը որևէ կերպ չի չարաշահել Լաչինի միջանցքն ու ապօրինի գործողություններ չի իրականացրել։
Հիշեցնենք նաև, որ Ադրբեջանն այդպես էլ չկարողացավ ՄԱԿ-ի Արդարադատության միջազգային դատարանում ապացուցել Լաչինի միջանցքի հետ կապված իր կեղծ թեզերը։
Էմմա Չոբանյան
