30.05.2026 | 23:02
ՊՍԺ-ն երկրորդ տարին անընդմեջ դարձավ Չեմպիոնների լիգայի հաղթող․ ՏԵՍԱՆՅՈՒԹ
ՌԴ-ն Հայաստանին և Ադրբեջանին է փոխանցել խաղաղության գործընթացի հիմնարար սկզբունքների ռուսական տեսակետները․ ՌԴ ԱԳ փոխնախարար
Քաղաքականություն
23.02.2023 | 14:46
Ռուսական կողմը հետևողական օգնություն է ցուցաբերում Հայաստանին և Ադրբեջանին խաղաղության պայմանագրի չափանիշների մշակման հարցում։ Այս մասին ՏԱՍՍ-ին տված հարցազրույցում ասել է ՌԴ ԱԳ փոխնախարար Միխայիլ Գալուզինը։
«Ռուսաստանը «նպատակաուղղված ջանքեր է գործադրում Բաքվի ու Երևանի միջև հարաբերությունները կարգավորելու համար։ Դրանց հիմքում բարձրագույն մակարդակով 2020-2021 թվականների եռակողմ պայմանավորվածությունների համալիրն է, որը նախատեսում է մի շարք առաջնային քայլեր, այդ թվում՝ երկու երկրների միջև տրանսպորտային կապերի ապաշրջափակում, հայ-ադրբեջանական սահմանի դելիմիտացիա, քաղաքացիական հասարակության միջոցով շփումներ: Մենք հետևողական աջակցություն ենք ցուցաբերում կողմերին խաղաղության պայմանագրի մշակման գործում»,- ասել է Գալուզինը։
Նա նշել է, որ «այդ քայլերը բերելու են պայմանների ստեղծման՝ տարածաշրջանում կայուն, արդար խաղաղություն հաստատելու համար, որի արտացոլումն էլ դառնալու է խաղաղության պայմանագիրը»։
«Մեր միջնորդությունը կառուցողական և բովանդակալից երկխոսության ապահովումն է՝ երկու կողմերի շահերը հաշվի առնող փոխընդունելի լուծումներ գտնելու համար։ Այդ նպատակով ՌԴ ԱԳՆ հատուկ ներկայացուցիչը հայ-ադրբեջանական հարաբերությունների կարգավորման հարցով Երևան և Բաքու պարբերական այցեր է կատարում։ Մենք նաև մեր գործընկերներին փոխանցել ենք ռուսական տեսակետները խաղաղության գործընթացի հիմնարար սկզբունքների և չափանիշների վերաբերյալ՝ հաշվի առնելով կողմերի մոտեցումները»,- ասել է ռուսաստանցի պաշտոնյան։
Էմմա Չոբանյան
