16.01.2026 | 16:09
Սոցփաթեթի գումարները կանխիկացնելու նոր տարբերակներ կգործեն․ ՏԵՍԱՆՅՈՒԹ
Մոլդովայի վարչապետն անհրաժեշտ է համարում Մերձդնեստրից ՌԴ զորքերի դուրսբերումը
Քաղաքականություն
21.02.2023 | 22:13
Մոլդովայի վարչապետ Դորին Ռեչանը հայտարարել է, որ անհրաժեշտ է Մերձդնեստրից դուրս բերել ռուսական զորքերի օպերատիվ խումբը, գրում է Ինտերֆաքսը։
«Մոլդովան ներգրավված է մի գործընթացում, որը ներառում է Մերձդնեստրի հիմնախնդրի բացառապես խաղաղ լուծում, դա նշանակում է, որ Ռուսաստանը պետք է դուրս բերի իր զորքերը, տարհանի զենքն ու զինամթերքը։ Ռուսաստանը խոստացել է դա անել, և ոչ մեկ անգամ: Մենք պետք է այնպես անենք, որ Ռուսաստանը կատարի իր խոստումները։ Սա է նշանակում ապառազմականացում»,- լրագրողներին ասել է Ռեչանը։
Նա հավելել է, որ խաղաղապահ գործողության կրճատման մասին խոսք չկա, որն իրականացվում է 1992 թվականի հուլիսի 21-ի ռուս-մոլդովական համաձայնագրով։
«Խոսքը ռուսական զորքերի աշխատանքային խմբի մասին է՝ ավելի քան 1500 ռուս զինվորականների, որոնք գտնվում են Մոլդովայի Հանրապետության տարածքում՝ առանց օրինական հիմքերի։ Իսկ Ռուսաստանը բազմիցս հաստատել է 14-րդ բանակի նախկին մնացորդները դուրս բերելու իր պարտավորությունները»,- ասել է Ռեչանը։
Անդրադառնալով Մոլդովայում իրավիճակի ապակայունացման թեմային՝ վարչապետն ասել է, որ նման սցենարներ կան, սակայն իրավասու մարմինները պատրաստ են մարտահրավերների։
Տաթև Ֆռանգյան
