07.06.2026 | 00:08
Ձերբակալվել է Բյուրական համայնքի նախկին ղեկավար Զարզանդ Գրիգորյանը
Ադրբեջանական կիբերհարձակում՝ հայկական բանկի դեմ․ ինչ է բացահայտել իսրայելական Check Point Research-ը․ ՏԵՍԱՆՅՈՒԹ
Քաղաքականություն
20.02.2023 | 22:10
Հայկական «Արցախբանկ»-ը և իսրայելցի բլոգեր Ալեքսանդր Լապշինն ադրբեջանական կիբերհարձակման թիրախում են հայտնվել։ Կիբերանվտանգության ոլորտում միջազգային հեղինակություն վայելող իսրայելական Check Point Research-ը ամիսներ տևած աշխատանքի արդյունքում բացահայտել է հայաստանյան թիրախների դեմ ադրբեջանական կիբերհարձակումը։ Ալեքսանդր Լապշինը Factor TV-ին պատմեց, որ ամիսներ առաջ «Արցախբանկ»-ից իր հետ կապվել են և տեղեկացրել, որ իր անվամբ էլեկտրոնային նամակներ են ստացել։ Լապշինը վստահեցրել է, որ ինքը նամակներ չի ուղարկել և զգուշացրել հնարավոր վիրուսային հարձակման մասին, որից հետո դիմել է իսրայելական և ամերիկյան կիբերանվտանգության ոլորտի ընկերություններին։
Հայաստանյան CyberHUB.Am-ը ներգրավված է եղել միջազգային հետաքննությանը։ Թիմի համահիմնադիր, մեդիափորձագետ Արթուր Պապյանն ասում է՝ հնարավոր չէ ամբողջությամբ բացահայտել, թե ինչպիսի թիրախներ է ընդգրկել վիրուսը, սակայն հստակ է մի բան՝ այն գործել է միայն հայաստանյան հայտնի IP հասցեներում։ Նրա խոսքով՝ «Արցախբանկ»-ի համակարգչային անվտանգության աշխատակիցները հասկացել են, որ ինչ-որ վնասաբեր ծրագիր կա, և կապվել են Ալեքսանդր Լապշինի հետ։
Factor TV-ն փորձեց «Արցախբանկ»-ից տեղեկանալ, թե ի՞նչ հետևանքներ է ունեցել կիբերհարձակումը և ի՞նչ մասշտաբի։ Բանկից հորդորեցին հարցերն ուղղել գրավոր։
Նշենք, որ Արցախ այցելելու համար Ադրբեջանի իշխանությունները հետախուզում էին հայտարարել Ալեքսանդր Լապշինի նկատմամբ, արդյունքում նա 2016 թվականին ձերբակալվել է Բելառուսում, արտահանձնվել Բաքվին և
9 ամիս անցկացրել ադրբեջանական բանտում։ Իր ապօրինի ազատազրկման փաստով Լապշին դիմել է Մարդու իրավունքների եվրոպական դատարան և շահել Բաքվի դեմ ներկայացրած հայցը։ ՄԻԵԴ-ն Ադրբեջանին պարտավորել է որպես փոխհատուցում բլոգերին վճարել 30 հազար եվրո։ ՄԻԵԴ-ի որոշումից հետո Լապշինը հրապարակել էր «Արցախբանկ»-ի իր քարտի լուսանկարը, որին Ադրբեջանը պետք է փոխանցեր փոխհատուցման գումարը։
Check Point Research-ն ու ինքը՝ Լապշինը կարծում են, որ հենց դա է հաքերային հարձակման պատճառը։
Արթուր Պապյանն իր հերթին ընդգծում է՝ մտադիր են շարունակել հետաքննությունը՝ հարձակման իրական ծավալների մասին ավելի հստակ պատկերացում կազմելու համար։
Մանրամասները՝ տեսանյութում։
Անի Թամրազյան
