ԱՄՆ-ն ապացույցներ է ներկայացրել Ուկրաինայի պատերազմում իրանական դրոնների օգտագործման վերաբերյալ

ԱՄՆ պաշտպանության նախարարության պաշտոնյաները փորձել են փարատել կասկածները, որ Իրանը անօդաչու սարքեր է մատակարարում Ռուսաստանին Ուկրաինայում պատերազմի համար՝ հրապարակելով հակամարտությունում ներգրավված անօդաչու սարքերի լուսանկարներ և վերլուծություններ՝ ցույց տալու համար Թեհրանի ուղիղ մասնակցությունը: Այս մասին գրում է «Ամերիկայի ձայն»-ը` հղում անելով Associated Press-ին:

Լոնդոնում կայացած ճեպազրույցի ժամանակ Պաշտպանության հետախուզական գործակալության վերլուծաբանները ցուցադրել են անօդաչու թռչող սարքերի լուսանկարները, որոնք հարձակվում են Ուկրաինայի վրա, ինչպես նաև անօդաչու սարքերի լուսանկարներ, որոնք նախկինում կապված են եղել Իրանի հետ:

Կառուցվածքային մանրամասների համեմատությունը ցույց է տալիս, որ Ուկրաինայում օգտագործվող զենքերը «չի տարբերվում» Shahid-131 և Shahid-136 հարվածային անօդաչու թռչող սարքերից և Mohajer-6 տեսակի դրոներից, որոնք օգտագործվում են Մերձավոր Արևելքում:

Կատարված աշխատանքի ցուցադրումը նպատակ ունի համոզել կառավարություններին և միջազգային կազմակերպություններին Թեհրանի ներգրավվածության մեջ։ Իրանը հայտարարել է, որ Ռուսաստանին «փոքր քանակությամբ» անօդաչու թռչող սարքեր է մատակարարել մինչև Ուկրաինա ներխուժումը, բայց ոչ այն բանից հետո, երբ ռուսական զորքերը անցած տարվա փետրվարին անցան Ուկրաինա:

Առկա ապացույցները այլ բան են հուշում, ասել է Պաշտպանության հետախուզական գործակալության պաշտոնյան՝ տեղեկատվության զգայուն բնույթի պատճառով չհրապարակելով իր անունը:

«Իրանը Ռուսաստանի գործընկերն է հակամարտությունում»,- ասել է պաշտոնյան։