Բրիտանիան ուկրաինացիներին սովորեցնում է կռվել «արևմտյան մոդելով»․ Ուոլես

Մեծ Բրիտանիայի պաշտպանության նախարար Բեն Ուոլեսը հայտարարել է, որ արևմտյան դաշնակիցները կարող են ավելի արագ օգնել Կիևին՝ ավելի շատ տեղում աջակցելով Ուկրաինայի դիրքերին, քան կենտրոնանալով ինքնաթիռներ ուղարկելու հարցի ուղղությամբ։ Նա նաև ասել է, որ ուկրաինացի զինվորականներին Բրիտանիայում սովորեցնում են կռվել «արևմտյան մոդելով», գրում է BBC-ի ռուսական ծառայությունը։

Լրատվամիջոցների հետ զրույցում Ուոլեսն ասել է, որ կործանիչների կիրառման համար կպահանջվեն զգալի թվով տեխնիկներ, որոնց վերապատրաստումը կպահանջվի ավելի քան մեկ ամիս, մինչդեռ Բրիտանիան կարող է շատ ավելի արագ օգնել Ուկրաինային հեռահար զենքի մատակարարման միջոցով:

«Կարծում եմ՝ մենք կկարողանանք ավելի կարճ ժամանակում օգնություն ցուցաբերել Ուկրաինային, եթե կենտրոնանանք ոչ թե կոնկրետ զենքի կոնկրետ պահանջների վրա, այլ այն ազդեցության, որը պետք է ունենա հայցվող զենքը մարտի դաշտում», – ասել է նա։

Բացատրելով, թե ինչու կործանիչների մատակարարումը կարող է հանգեցնել դժվարությունների, նա նշել է, որ մի բան է՝ «տալ սովորական մեքենա, որը ես կամ դու կարող ենք վարել», և բոլորովին այլ բան՝ Formula-1-ի մեքենա։

Նա նշել է, որ Մեծ Բրիտանիան նաև սովորեցնում է ուկրաինացի զինվորներին ավելի քիչ զինամթերք օգտագործել՝ համեմատած ավանդական խորհրդային պատերազմի մեթոդի հետ։

«Ուկրաինան ահռելի քանակությամբ զինամթերք է օգտագործում ինքնապաշտպանության համար, ինչի համար էլ մասամբ մենք նրանց վարժեցնում ենք կռվել արևմտյան մոդելով։ Ռուսական (կամ խորհրդային) մարտական ​​եղանակը ներառում է զինամթերքի զգալի ծախսեր, զանգվածային հրետանային ռմբակոծություն, մինչդեռ ՆԱՏՕ-ում մենք այլ կերպ ենք կռվում»,- ասել է նա՝ նշելով, որ Բրիտանիան նաև գնում և Ուկրաինային է փոխանցում խորհրդային ստանդարտների զինամթերք, սակայն նաև օգնում է օգտագործել արևտյան ստանդարտների զինամթերքը։

Էմմա Չոբանյան