24.11.2024 | 21:56
Միակն ու անկրկնելին. ՀՀ-ում Ֆրանսիայի դեսպանի արձագանքը՝ Ադրբեջանի տարածքային պահանջներին
Համաշխարհային օվկիանոսի մակարդակի բարձրացման դեպքում ամբողջական երկրներ կարող են անհետանալ․ ՄԱԿ
Քաղաքականություն
15.02.2023 | 21:28
Գլոբալ տաքացմամբ պայմանավորված համաշխարհային օվկիանոսի մակարդակի բարձրացումը կհանգեցնի «աստվածաշնչյան մասշտաբների հասնող զանգվածային մահացության»։ ՄԱԿ-ի Անվտանգության խորհրդի նիստում նման կանխատեսում է արել կազմակերպության գլխավոր քարտուղար Անտոնիո Գուտերեշը՝ կոչ անելով փոփոխություններ կատարել ապաստանի և միջազգային իրավունքի ոլորտում օրենսդրության մեջ՝ ավելի լավ պաշտպանելու նրանց, ովքեր կարող են տառապել այս աղետից, գրում է DW-ի ռուսական ծառայությունը։
ՄԱԿ-ի տվյալներով՝ այսօր մոլորակի վրա 900 միլիոն մարդ ապրում է ցածրադիր ափամերձ շրջաններում, և բոլորն էլ առանձնակի վտանգավոր գոտում են:
«Ամբողջական երկրներ կարող են ընդմիշտ անհետանալ»,- նախազգուշացրել է Գուտերեշը։
Սառցադաշտերի շարունակվող հալման ֆոնին վտանգի տակ կլինեն ոչ միայն կղզի պետությունները, այլև այնպիսի երկրներ, ինչպիսիք են Բանգլադեշը, Չինաստանը, Հնդկաստանը և Նիդեռլանդները, պարզաբանել է նա։
Փորձագետների կարծիքով՝ Համաշխարհային օվկիանոսի մակարդակի բարձրացումը կուղեկցվի ավելի հաճախակի փոթորիկներով ու ջրհեղեղներով։ Միաժամանակ, աղի պատճառով հողն ու ջուրը կաղտոտվեն, շատ տարածքներ կդառնան կյանքի համար ոչ պիտանի։
Ըստ ՄԱԿ-ի կլիմայի փորձագետների՝ 1900-2018 թվականներին համաշխարհային օվկիանոսի մակարդակը բարձրացել է 15-25 սանտիմետրով։ Եթե 2100 թվականին Երկրի օդի ջերմաստիճանը երկու աստիճանով ավելի տաք լինի, քան նախաինդուստրիալ դարաշրջանում, սպասվում է, որ համաշխարհային ծովի մակարդակը կբարձրանա ևս 43 սանտիմետրով: Ջերմաստիճանի 3-4 աստիճանով բարձրացման դեպքում այս ցուցանիշը կարող է հասնել 84 սանտիմետրի:
2023 թվականի հունվարի սկզբին Science ամսագրում հրապարակվել է հետազոտություն, ըստ որի՝ Երկրի վրա գլոբալ տաքացման ներկայիս տեմպերով մինչև 2100 թվականը սառցադաշտերի 68%-ը կարող է անհետանալ։
Տաթև Ֆռանգյան
