06.06.2026 | 19:05
Բիթքոյնը կորցնում է գրավչությունը․ ներդրողները նախընտրում են AI ընկերություններն ու խոշոր IPO-ները
Թուրքիան հետաձգել է գազային հանգույցի հարցով գագաթնաժողովը
Քաղաքականություն
09.02.2023 | 23:10
Թուրքիան հետաձգել է գազային հանգույցի քննարկմանը նվիրված գագաթնաժողովը մոտավորապես մինչև մարտի 21-22-ը։ Այս մասին Ինտերֆաքսին հայտնել են իրավիճակին ծանոթ աղբյուրները։
Զրուցակիցներից մեկի խոսքով՝ գագաթնաժողովը հետաձգվել է Թուրքիայում տեղի ունեցած երկրաշարժի պատճառով։ Փետրվարի 14-15-ը Ստամբուլում պետք է անցկացվեր գազի հարցով գագաթնաժողովը (Istanbul Gas Summit), որին մասնակցելու էին Մերձավոր Արևելքի, Միջերկրական և Կենտրոնական Ասիայի երկրները, ինչպես նաև սպառողներ Եվրոպայից։ Այս մասին հայտնել էր Թուրքիայի էներգետիկայի և բնական պաշարների նախարար Ֆաթիհ Դյոնմեզը։
Ռուսաստանի նախագահի խոսնակ Դմիտրի Պեսկովը, պատասխանելով հարցին՝ արդյո՞ք Թուրքիայում երկրաշարժը կարող է ազդել նախագծի իրականացման վրա, այսօր ասել է, որ պետք է ըմբռնումով վերաբերվել դրան։ Նա նշել է, որ հիմա դա Թուրքիայի առաջնահերթությունը չէ։
«Հետևաբար՝ այո՛, այս գործընթացը (գազի հանգույցի ստեղծումը) կարող է մի փոքր շարժվել, բայց իրականում դա չի ազդի ծրագրերի իրականացման վրա»,- ասել է Կրեմլի խոսնակը։
ՌԴ նախագահ Վլադիմիր Պուտինն ավելի վաղ հանդես էր եկել Սև ծովի հատակով Ռուսաստանից Թուրքիա լրացուցիչ գազատարներ անցկացնելու, ինչպես նաև ԵՄ սահմանին գազի հանգույց ստեղծելու նախաձեռնությամբ։
Էմմա Չոբանյան
