14.09.2026 | 22:01
Հայաստանի մի շարք հասցեներում էլեկտրաէներգիայի անջատումներ կլինեն
Քրեական ենթամշակույթ կրող անձանց գործը կքննվի Մարալիկում․ այս գործով դատավորը ևս լքել է Շիրակի մարզը
Հասարակություն
06.02.2023 | 21:53
Գյումրեցի քրեական ենթամշակույթ կրող անձանց դեմ հարուցված քրեական գործի քննությունը Շիրակի մարզի ընդհանուր իրավասության դատարանից տեղափոխվել է Մարալիկի դատարան։ Այս գործն արդեն վեց ամիս լսվել է Շիրակի մարզի ընդհանուր իրավասության դատարանում՝ դատավոր Ռոման Սմբատյանի կողմից, սակայն նա ևս, ինչպես և այս դատարանի քրեական գործեր քննող մյուս 3 դատավորները, ԲԴԽ-ի որոշմամբ տեղափոխվել են մայրաքաղաք։
Փաստաբանների խոսքով՝ Շիրակի դատարանի աշխատանքը պարալիզացված է․ նոր նշանակված դատավորները զրոյից պետք է ծանոթանան քրեական գործերին ու նոր քննություն սկսեն։
«Դատալեքս» դատական տեղեկատվական համակարգից տեղեկանում ենք, որ քրեական ենթամշակույթ կրող անձանց դատավարությունը շարունակվելու է Շիրակի մարզի Մարալիկ քաղաքի դատարանում, այն քննելու է դատավոր Արամայիս Ասատրյանը։
Փաստաբանների ներկայացմամբ՝ այս պահի դրությամբ Արամայիս Ասատրյանը քրեական գործեր քննող միակ դատավորն է Շիրակի մարզում, սակայն նա ևս պատրաստվում է հեռանալ։ Ըստ «Դատալեքս»-ի տեղեկատվության՝ Բարձրագույն դատական խորհրդի որոշմամբ՝ նա Երևան քաղաքի առաջին ատյանի ընդհանուր իրավասության քրեական դատարանից գործուղված դատավոր է։
Հիշեցնենք, որ նշված գործով անցնում են քրեական ենթամշակույթ կրող 8 անձինք, որոնց թվում կան նաև հայտնի գործարարներ։ Նրանցից չորսն ազատ են արձակվել գրավի դիմաց։ Այս գործով անցնում են երկու օրենքով գողեր՝ Սուրեն Ավետիսյանը՝ «Պաշի տղա Սուրո Լեննականսկի» մականվամբ և Արտյոմ Ղազարյանը՝ հայտնի «Զապի եգան Արտյոմ Լեննականսկի» մականվամբ։
Ըստ քրգործի՝ Սուրեն Ավետիսյանը ստեղծել և ղեկավարել է քրեական ենթամշակույթ կրող խմբավորում՝ իր կողմից հետապնդվող նպատակների իրականացմանն ուղղված գործողություններ կատարելու միջոցով։
Արմիկ Մովսիսյան
