Թուրքիայի ընդդիմադիր դաշինքի վարկանիշը գերազանցել է Էրդողանինը․ նոր սոցհարցում

Թուրքիայի նախագահ Ռեջեփ Թայիփ Էրդողանի Հանրային դաշինքը, որը ներառում է նրա իշխող «Արդարություն և զարգացում» կուսակցությունը (AKP) և դաշնակից ծայրահեղ աջ «Ազգայնական շարժում» կուսակցությունը (MHP), կպարտվեր երկրի ընդդիմադիր դաշինքին, եթե համընդհանուր ընտրություններն անցկացվեին հունվարին։ Նման պատկեր է՝ ըստ Aksoy Research-ի անցկացված հարցման, գրում են թուրքական լրատվամիջոցները։

Հարցին, թե ո՞ր կուսակցության օգտին կքվեարկեիք, եթե այս կիրակի անցկացվեին համընդհանուր ընտրություններ, հարցվածների 42,6 տոկոսն ասել է, որ կքվեարկի ընդդիմադիր դաշինքի կուսակցությունների օգտին, իսկ 41 տոկոսը նշել է, որ կաջակցի AKP-MHP դաշինքին։

Հարցման համաձայն՝ իշխող «Արդարություն և զարգացում» կուսակցությունը կհավաքեր ձայների 33,3 տոկոսը, մինչդեռ նրա դաշնակիցը՝ MHP-ն, միայն 7,7 տոկոսը։ Հարցումը ցույց է տվել, որ ընդդիմադիր դաշինքի կուսակցությունները՝ հիմնական ընդդիմադիր Ժողովրդահանրապետական կուսակցությունը (CHP), ազգայնական İYİ (Լավ) կուսակցությունը, Ժողովրդավարություն և առաջադիմություն կուսակցությունը (DEVA), Ապագա կուսակցությունը և Ուրախություն կուսակցությունը կհավաքեին ձայների 25,5-ից մինչև 0,2 տոկոսը: Հանրագումարում առաջ են անցնում իշխող դաշինքից։

Տվյալները ցույց են տալիս, որ իշխող ԱԶԿ-ն, որը 2022 թվականի վերջին եռամսյակում ընդհանուր առմամբ ավելացրել է իր ձայները 4,8 տոկոսով, հունվարին կորցրել է իր ձայների 1,2 տոկոսը։

Մեկնաբանելով հարցման արդյունքները՝ Aksoy Research-ի հիմնադիր Էրթան Աքսոյն ասել է, որ ԱԶԿ-ի քվեների նվազման պոտենցիալ կա, քանի որ մոտենում են մայիսին նախատեսված ընտրությունները՝ դա վերագրելով «ընտրական տնտեսությանը», որը կարող է առաջացնել գնաճի աճ:

Վերջին համընդհանուր ընտրություններում, որոնք անցկացվել են 2018 թվականի հունիսին, ԱԶԿ-ն հավաքել է համազգային ձայների 42,6 տոկոսը: Այնուամենայնիվ, հասարակական հարցումները գնալով ցույց են տալիս, որ կուսակցության հանրային աջակցությունը նվազում է:

Էմմա Չոբանյան