19.12.2025 | 19:33
Յուրա Մովսիսյանը լավատեսորեն է տրամադրված Հայաստանի հավաքականի ապագայի վերաբերյալ
Մենենդեսը դիմել է ԱՄՆ Առևտրի նախարարությանը՝ Ադրբեջանին մահաբեր զենքի մատակարարում թույլ չտալու համար
Քաղաքականություն
02.02.2023 | 16:59
ԱՄՆ Սենատի արտաքին հարաբերությունների հանձնաժողովի նախագահ, սենատոր Բոբ Մենենդեսը նամակ է ուղարկել Առևտրի նախարար Ջինա Ռայմոնդոյին։ Սենատորը կտրականապես դեմ է արտահայտվել առևտրի դեպարտամենտի ծրագրերին՝ քննարկելու հրազենի արտահանման լիցենզիա տրամադրելու հարցը, այդ թվում՝ Ադրբեջանին հնարավոր գրոհային կամ դիպուկահար կիսաավտոմատ ինքնաձիգների։
Ընդգծելով հայերի դեմ Ադրբեջանի վայրագությունների մասին լավ փաստագրված և արժանահավատ մեղադրանքները, ներառյալ 2020 թվականի Լեռնային Ղարաբաղի պատերազմի և 2022 թվականի Հայաստան ներխուժման հետևանքով հազարավոր հայերի սպանությունն ու տեղահանումը, հավելում՝ նաև Բաքվի կողմից Լաչինի միջանցքի շարունակական շրջափակումը՝ Մենենդեսը կոչ է արել քարտուղար Ռայմոնդոյին ապահովել, որ ոչ մի մահաբեր զենք չուղարկվի Ադրբեջանում որևէ անձի կամ կազմակերպության:
«Զենքի արտահանումը ավտորիտար երկիր, որը պատերազմ է մղում հարևանի դեմ, շրջափակում է խոցելի բնակչությանը և թույլ է տալիս մարդու իրավունքների համատարած խախտումներ, համահունչ չէ ժողովրդավարության և մարդու իրավունքների նկատմամբ վարչակազմի հավատարմությանը։ Ես կտրականապես դեմ եմ Ադրբեջան ցանկացած մահաբեր զենք ուղարկելուն»,-գրում է սենատորը։
Նամակում նա նաև հետաքրքվում է, թե արդյո՞ք նախարարությունը խորհրդակցել է Պետքարտուղարության հետ զենքի արտահանման լիցենզիա տրամադրելու հարցով։
Էմմա Չոբանյան
