15.01.2025 | 10:17
Արտարժույթների փոխարժեքները՝ հունվարի 15-ի դրությամբ
Հիվանդասենյակ տեղափոխված կապիտանը դեռ չի հարցաքննվել, նա հսկողության տակ է
Հասարակություն
30.01.2023 | 15:01
Գեղարքունիքի մարզի Ազատ գյուղում տեղակայված ինժեներասակրավորային վաշտի կացարանում հունվարի 19-ին բռնկված հրդեհի հետևանքով այրվածքներ ստացած զինծառայողները, որոնք վերակենդանացման բաժանմունքում էին, տեղափոխվել են հիվանդասենյակ։ Տեղեկությունը Factor.am-ին հայտնեց Առողջապահության նախարարության խոսնակ Հռիփսիմե Խաչատրյանը: Զինծառայողների վիճակը գնահատվում է միջին ծանրության։
Նշենք, որ այս պահին Այրվածքաբանության ազգային կենտրոնում բուժում են ստանում հրդեհից տուժած 3 զինվորներ։ Պաշտոնական վարկածի համաձայն՝ հիվանդասենյակ տեղափոխված կապիտանին է մեղսագրվում կացարանում հրդեհի բռնկումը։ Քննչական կոմիտեի մամուլի խոսնակ Գոռ Աբրահամյանը Factor.am-ին հայտնեց, որ այս պահի դրությամբ միայն կապիտանը չի հարցաքննվել, նա հսկողության տակ է։
Հիշեցնենք, որ ՀՀ քրեական օրենսգրքի 532-րդ հոդվածի 4-րդ մասի հատկանիշներով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու կամ ավելի անձանց մահ) դեպքից հետո նախաձեռնվել է քրեական վարույթ։ Քրեական վարույթ է նախաձեռնվել նաև պաշտոնատար անձանց կողմից հրդեհային անվտանգության սահմանված կանոնները չպահպանելու, դրա հետ կապված գործառույթները կատարելու հարցում առերևույթ անփութություն դրսևորելու փաստի առթիվ։
Այս գործով կալանավորվել է ՀՀ ՊՆ N զորամասի թիկունքի պետ-հրամանատարի թիկունքի և կոմունալ շահագործման ծառայության գծով տեղակալ Գոռ Աղեկյանը։
Արփի Հակոբյան
