Բորիս Ջոնսոնը պատմել է, որ Վլադիմիր Պուտինը սպառնացել է «ցավեցնել իրեն»

Մեծ Բրիտանիայի նախկին վարչապետ Բորիս Ջոնսոնը BBC-ի նկարահանած վավերագրական ֆիլմում պատմել է, որ Ռուսաստանի նախագահ Վլադիմիր Պուտինը Ուկրաինա Ռուսաստանի ներխուժումից առաջ հեռախոսազրույցի ժամանակ սպառնացել է իրեն հրթիռներով։
Ֆիլմը, որը պատմում է պատերազմի մեկնարկից առաջ Պուտինի և համաշխարհային առաջնորդների փոխհարաբերությունների մասին, կցուցադրվի երկուշաբթի երեկոյան։ Մինչ այդ BBC-ի ռուսական ծառայությունը դրանից մի հատված է հրապարակել:
«Ինչ-որ պահի նա կարծես սպառնաց ինձ և ասաց. «Բորիս, ես չեմ ուզում քեզ ցավեցնել, սակայն հրթիռով դրա համար ընդամենը մեկ րոպե կամ  մոտավորապես այդքան կպահանջվի», – Պուտինի խոսքերն է մեջբերում Ջոնսոնը: Երկարատև հեռախոսազրույցը տեղի է ունեցել անցյալ փետրվարին, իսկ Պուտինը նման մեկնաբանություն է արել Ջոնսոնի այն զգուշացումից հետո, թե Ուկրաինայում պատերազմն աղետալի կլինի: «Դատելով նրա չափազանց հանգիստ տոնայնությունից, այն անտարբերությունից, որ նա ուներ, նա պարզապես բանակցությունների դրդելու իմ փորձերի հետ խաղում էր»,-ասել է նախկին վարչապետը։

Ջոնսոնը նաև փորձել է Ռուսաստանի նախագահին հասցնել այն, որ Ուկրաինան մոտ ապագայում չի անդամակցի ՆԱՏՕ-ին և զգուշացրել է Պուտինին, որ ցանկացած ներխուժում կնշանակի Ռուսաստանի սահմաններին «ավելի շատ ՆԱՏՕ, այլ ոչ թե պակաս ՆԱՏՕ»:
«Նա հարցրեց․ «Բորիս, դու ասում ես, որ Ուկրաինան մոտ ժամանակում չի պատրաստվում անդամակցել ՆԱՏՕ-ին, ի՞նչ է նշանակում մոտ ժամանակում»: Եվ ես ասացի․ «Այն չի պատրաստվում անդամակցել ՆԱՏՕ-ին տեսանելի ապագայում։ Դուք դա հիանալի գիտեք»։

«Հայտնի չէ, թե ինչքան լուրջ էին Պուտինի կողմից սպառնալիքները, սակայն հաշվի առնելով Մեծ Բրիտանիայի վրա ՌԴ-ի նախորդ հարձակումները, այդ թվում՝ Սկրիպալների թունավորումը Սոլսբերիում, ՌԴ ղեկավարի կողմից ցանկացած սպառնալիք, ամենայն հավանականությամբ, լրջորեն է ընդունվել Ջոնսոնի կողմից»-, գրում է BBC-ի լրագրողը։

Տաթև Ֆռանգյան