Ադրբեջանցի պաշտոնյայի և Արայիկ Հարությունյանի հանդիպումը տապալվել է՝ Բաքուն նախապայմաններ է առաջադրել․ Տիգրան Գրիգորյան․ ՏԵՍԱՆՅՈՒԹ

ԵՄ Խորհուրդը որոշում կայացրեց ՀՀ-ում դիտորդների տեղակայել այն պայմաններում, երբ Ալիևը շաբաթներ առաջ բաց քննադատում էր ԵՄ-ին, որ առանց Բաքվի հետ համաձայնեցնելու են մտադիր հայ-ադրբեջանական սահմանին հայկական կողմից դիտորդական առաքելություն տեղակայել։ Ադրբեջանի ԱԳՆ-ն ասել է, թե «դիտորդական առաքելության գործունեությունն ուղեկցվել է լուրջ շեղումներով Պրահայում ձեռք բերված պայմանավորվածություններից՝ ԵՄ որոշ անդամ երկրների կողմնակալ մոտեցման պատճառով․ «ԵՄ առաքելության առկայությունը չպետք է օգտագործվի՝ խաթարելու Ադրբեջանի և Հայաստանի միջև հարաբերությունների կարգավորման գործընթացը, ներառյալ սահմանների սահմանազատման գործընթացը, որը պետք է իրականացվի երկկողմանի հիմունքներով։ ԵՄ առաքելության ներկայությունը Հայաստանում չպետք է պատրվակ ծառայի Երևանի համար՝ խուսափելու իր պարտավորությունների կատարումից։ ԵՄ առաքելության ներկայության չարաշահումը վտանգավոր է գոյություն ունեցող երկխոսության մեխանիզմների համար և դրանից պետք է խուսափել»։

Անդրադառնալով Ադրբեջանի իշխանության հնչեցրած մտահոգություններին՝ քաղաքագետ Տիգրան Գրիգորյանը Factor TV-ին տված հարցազրույցում ասում է, որ վստահաբար Հայաստանի իշխանությունները կշարունակեն խոսել խաղաղության օրակարգից՝ չնայած ԵՄ դիտորդների տեղակայվելուն։

«Կարծում եմ՝ ավելի նորմալ պայմաններ են ստեղծվում կառուցողական բանակցությունների համար։ Ադրբեջանը փորձում է պարտադրել Հայաստանին իր պատկերացումները։ Բայց Հայաստանի իշխանությունները կարող են ոչ թե միանգամից կատարել այդ պարտադրանքները, այլ բանակցել, փորձել սեփական պատկերացումները ներառել այդ փաստաթղթերի մեջ։ Այդ առումով, իհարկե, բարդանալու է այդ փաստաթղթի ստորագրումը»,- ասաց Տիգրան Գրիգորյանը։

Հարցազրույցն ամբողջությամբ՝ տեսանյութում։

Ռոբերտ Անանյան