Քաղաքականություն
23.01.2023 | 22:13
Հունաստանում և Թուրքիայում ընտրությունները տեղի կունենան մոտավորապես նույն ժամանակահատվածում․ ամենայն հավանականությամբ, մայիսի 14-ին տեղի կունենան երկրորդ խորհրդարանական ընտրությունները Հունաստանում, նույն օրը, երբ Թուրքիայում և՛ նախագահ, և՛ խորհրդարան կընտրեն, գրում է ekathimerini-ն։
Լրատվամիջոցը նշում է, որ սա նշանակում է, որ Հունաստանում առաջին ընտրությունները պետք է տեղի ունենան ամենաուշը մինչև ապրիլի 9-ը: Այլապես, հունական երկու ընտրություններ կարող են տեղի ունենալ, համապատասխանաբար, մայիսի 14-ին և հունիսի 22-ին: Սակայն ամսաթվերի այս համադրությունը ավելի քիչ հավանական է թվում, քանի որ ընտրությունների երկրորդ ամսաթիվը համընկնում է համալսարանի ընդունելության քննություններին:
Հունաստանի պաշտոնյաները մտահոգություն էին հայտնել, որ Թուրքիայի նախագահ Ռեջեփ Թայիփ Էրդողանը, որը նախընտրական արշավի ընթացքում ուժեղացրել է Հունաստանի նկատմամբ իր ագրեսիվ հռետորաբանությունը, կարող է միջադեպ հրահրել երկու ընտրությունների միջև ընկած ժամանակահատվածում:
Գերմանիան և ԱՄՆ-ն արդեն միջամտել են կամ նախատեսում են դա անել՝ համոզվելու համար, որ նման էսկալացիա տեղի չի ունենա: Գերմանիան դեկտեմբերին արդեն երկու երկրների ղեկավարների խորհրդականների միջև հանդիպում էր կազմակերպել։ Իսկ ահա ԱՄՆ պետքարտուղար Էնթոնի Բլիքենը պատրաստվում է փետրվարին այցելել Անկարա ու Աթենք։
Հավելենք, որ Թուրքիայի իշխանությունները գրեթե ամենօրյա ռեժիմով սպառնում են Հունաստանին։
Ի դեպ, Թուրքիայում էլ ընտրություններն անցկացվելու են մայիսի 14-ին, որի մասին հայտարարել է Էրդողանը։
Էմմա Չոբանյան
