ՆԱՏՕ-ի երկրները ռազմական օգնություն են խոստացել Ուկրաինային Գերմանիայում կայանալիք հանդիպման նախաշեմին

ՆԱՏՕ-ի անդամ 11 երկրներից բաղկացած խումբը՝ ներառյալ Մեծ Բրիտանիան և Լեհաստանը, խոստացել են լրացուցիչ ռազմական աջակցություն ցուցաբերել Ուկրաինային՝ օգնելու նրան պայքարել Ռուսաստանի դեմ։ VOA-ի փոխանցմամբ՝ այս մասին հայտնի է դարձել Կիևի համար սպառազինությունների վերաբերյալ կարևոր հանդիպման նախօրեին, որը պետք է տեղի ունենա Գերմանիայում։

«Արևմուտքը պետք է մնա միասնական և շարունակի սատարել Ուկրաինային ռազմական աջակցությամբ»,- ասել է Էստոնիայի պաշտպանության նախարար Հաննո Պևկուրը բրիտանացի գործընկերոջ և այլ պաշտոնյաների հետ համատեղ մամուլի ասուլիսում։

Ռազմակայանում հավաքված պաշտոնյաները պարտավորվել են տրամադրել հրթիռներ, Stinger շարժական ՀՕՊ համակարգեր, գնդացիրներ, այլ սարքավորումներ և ծառայություններ: Մեծ Բրիտանիան, որն արդեն հայտարարել է Ուկրաինա տանկեր ուղարկելու ծրագրերի մասին, կմատակարարի նաև 600 Brimstone հրթիռ, ասել է պաշտպանության նախարար Բեն Ուոլեսը։

Լեհաստանը կուղարկի S-60 զենիթային համակարգեր՝ 70,000 փամփուշտներով և պատրաստ է նվիրաբերել Leopard 2 տանկերի վաշտ՝ «նման տանկերի դոնորների ավելի լայն կոալիցիա ստեղծելու ակնկալիքով», ասվում է հանդիպման արդյունքներով համատեղ հայտարարության մեջ։

Ակնկալվում է, որ Leopard տանկերի պոտենցիալ մատակարարումը կլինի օրակարգում, երբ երկրների ավելի լայն խումբ, ներառյալ՝ ԱՄՆ-ը, ուրբաթ կհանդիպեն Գերմանիայի Ռամշտեյն ավիաբազայում:

Հինգշաբթի Միացյալ Նահանգները և Գերմանիան փորձեցին հարթել Leopard-ի շուրջ տարաձայնությունները, որոնք Բեռլինը մինչ այժմ հրաժարվում էր մատակարարել Ուկրաինային, սակայն այդ ջանքերի արդյունքների մասին դեռևս չի հաղորդվում:

Տաթև Ֆռանւյան