12.01.2025 | 22:00
Ընտրությունները կեղծվեցին, բայց մենք էլ չպատրաստվեցինք այնպես, ինչպես անհրաժեշտ էր․ Զուրաբիշվիլի
Ադրբեջանի Մեջլիսը դատապարտել է Եվրախորհրդարանի՝ Լաչինի միջանցքին վերաբերող բանաձևը
Քաղաքականություն
20.01.2023 | 14:04
Ադրբեջանի Միլի Մեջլիսը (խորհրդարան) արձագանքել է Եվրախորհրդարանի կողմից Լաչինի միջանցքի վերաբերյալ նախօրեին ընդունված բանաձևը՝ դատապարտելով այն։
Հիշեցնենք, որ Եվրախորհրդարանը 11 կետից բաղկացած բանաձև է ընդունել Լեռնային Ղարաբաղի շրջափակման հումանիտար հետևանքների վերաբերյալ, որով Ադրբեջանից պահանջում է ապաշրջափակել Լաչինի միջանցքը։ Բանաձևը դատապարտում է ռուս խաղաղապահների անգործությունը, կարծում է, որ նրանց փոխարինումը ՄԱԿ-ի մանդատի ներքո ԵԱՀԿ միջազգային խաղաղապահներով պետք է դառնա հրատապ բանակցությունների թեմա։ Ընդգծում է համապարփակ խաղաղության համաձայնագրի անհրաժեշտությունը, որը պետք է երաշխավորի Լեռնային Ղարաբաղի հայ բնակչության իրավունքներն ու անվտանգությունը։
Ադրբեջանի խորհրդարանը դժգոհություն է հայտնել այս բանաձևի առնչությամբ։
«Մենք մեր բողոքն ենք հայտնում 2023 թվականի հունվարի 19-ին Եվրախորհրդարանի կողմից ընդունված կողմնակալ և անարդար բանաձևի դեմ, որը հիմնված է ստի և անհիմն մեղադրանքների վրա»,- ասվում է հայտարարության մեջ։
Բացի այդ, բանաձևի հեղիակներին Մեջլիսը մեղադրում է երկակի ստանդարտների, իսկ Հայաստանին՝ 2020 թվականի նոյեմբերի 9-ի հայտարարության դրույթները, իբր, խախտելու համար։ Ադրբեջանի խորհրդարանը նշում է, թե Լաչինի միջանցքը, իբր, «բաց է ռուս խաղաղապահների, Կարմիր Խաչի կոմիտեի ներկայացուցիչների կողմից մարդասիրական ապրանքների փոխադրման, ինչպես նաև Ղարաբաղում բնակվող հայերի, այդ թվում՝ երեխաների և հիվանդների փոխադրման համար»։
«Ափսոսանք է առաջացնում, որ եվրոպացի պատգամավորները ոչ միայն չեն տեսնում և չեն էլ ուզում տեսնել Ադրբեջանի ստեղծած նոր իրողությունը տարածաշրջանում, այլ հետևողականորեն խաթարում են խաղաղ բանակցությունների գործընթացը, որն Ադրբեջանն առաջ է տանում վերջին երկու տարիներին»,- ասվում է հայտարարության մեջ։
Դրանում նաև կոչ է արվում Եվրախորհրդարանի ղեկավարությանը՝ վերջ տալ «նման ապակառուցողական և կողմնակալ նախաձեռնություններին»։
Էմմա Չոբանյան
