09.10.2026 | 10:15
Մարտի 1-ի գործով ոստիկանության զորքերի նախկին հրամանատար Գրիգոր Գրիգորյանի գործն ուղարկվել է դատարան
Վրաստանում քաղաքացին պատշգամբից կրակ է բացել բակում հավաքված մարդկանց վրա
Քաղաքականություն
20.01.2023 | 11:17
Վրաստանի Ներքին գործերի նախարարության պաշտոնական հաղորդագրության համաձայն՝ Սագարեջո քաղաքում հրաձգության հետևանքով զոհվել է հինգ մարդ, այդ թվում՝ մեկ ոստիկան, ևս հինգը վիրավորվել են։ Ինչպես նշվում է գերատեսչության հաղորդագրության մեջ, Սագարեջոյի շրջանում մոբիլիզացվել են ՆԳՆ համապատասխան ստորաբաժանումների աշխատակիցները, որոնք օպերատիվ-հետախուզական միջոցառումներ են իրականացնում, գրում է Գրուզիա օնլայնը։
«Քննության տվյալներով՝ 1974 թվականին ծնված Ն.Ա.-ն մի քանի կրակոց է արձակել բնակելի շենքի բնակարաններից մեկի պատշգամբից, ինչի հետևանքով տան բակում զոհվել է 4, վիրավորվել՝ 5 մարդ։ Մեղադրյալը կրակ է բացել նաև դեպքի վայր ժամանած ՆԳՆ աշխատակիցների ուղղությամբ, որոնցից մեկը նույնպես մահացել է։ Դեպքի վայրում մոբիլիզացվել են ոստիկանության լրացուցիչ ստորաբաժանումներ, ներգրավվել է ՆԳՆ հատուկ նշանակության ստորաբաժանումը, որի ժամանելուն պես հրաձիգն ինքնասպան է եղել։ Քրեական գործ է հարուցվել։
Վրաստանի Ներքին գործերի նախարար Վախթանգ Գոմելաուրին լրագրողներին հայտնել է, որ հատուկ գործողությունն ավարտվել է:
«Շատ ծանր դեպք է։ Ցավակցում ենք ընտանիքներին։ Հինգ հոգի զոհվել է։ Ցավոք, նրանցից մեկը մեր աշխատակիցն է: Հինգ վիրավորներից մեկի վիճակը ծանր է: Նրան վիրահատում են․վնասվել է զարկերակը, և հնարավոր չէ ասել՝ նա ողջ կմնա, թե ոչ», – ասել է Գոմելաուրին։
Տաթև Ֆռանգյան
