Ալիևի ռեժիմը միջազգայնորեն մեկուսացնելուն է ուղղված Եվրախորհրդարանի հայտարարությունը․ միջազգային մթնոլորտ է ձևավորում․ Արման Մելիքյան․ ՏԵՍԱՆՅՈՒԹ

Factor TV-ի հարցազրույցը արտակարգ և լիազոր դեսպան, Արցախի նախկին ԱԳ նախարար Արման Մելիքյանի հետ

-Պարո՛ն Մելիքյան, զրույցը սկսենք այսօր տեղի ունեցած ողբերգական դեպքից՝ Սոթքում զորամասի կացարանում հրդեհ է բռնկվել, 15 զինվոր է զոհվել։ Ինչո՞ւ է հնարավոր դառնում նման ողբերգական դեպքը՝ Զինված ուժերում բարեփոխումների մասին հնչեղ հայտարարությունների ֆոնին։

-Իհարկե, պատահականությունից որևէ մեկը չի կարող իրեն ապահովագրված զգալ։ Մյուս կողմից՝ հասկանալի է, որ համակարգային փոփոխությունների կազմակերպման գործընթացը պետք է հիմնված լինի իրապես լուրջ թե՛ տեսական, թե՛ գործնական հիմքերի վրա։ Չգիտեմ՝ այդպես է այսօր բանակում, թե՝ ոչ, իմ տպավորությունն այն է, որ՝ ոչ։ Ամեն դեպքում, դա այն է, ինչին մենք պետք է ձգտենք ինչպես պետական մակարդակում, այնպես էլ անձնական, անհատական։

-Երասխում հակառակորդի կրակոցից զինծառայող է վիրավորվել, վիճակը ծանր է։ Բաքուն սկսել է ակտիվանա՞լ սադրանքների հարցում։

-Ես կարծում եմ՝ Բաքուն բոլոր դեպքերում երբևէ չի դադարել սադրանքների դիմելուց։ Երբեմն մարտավարական հանգիստ շրջաններ է թույլ տվել, բայց, ընդհանուր առմամբ, ռազմավարությունը նույնն է, և այդ ռազմավարության շրջանակում Բաքվի գործողությունները որոշակի տրամաբանության են ենթարկվում։ Այլ խնդիր է, որ մենք դրան համարժեք հակախաղ կազմակերպելու ունակություն չենք դրսևորել՝ թե՛ Հայաստանում, թե՛ Արցախում, և սա խորապես մտահոգիչ երևույթ է։

-Իսկ ո՞րն է Բաքվի գործողությունների այդ որոշակի տրամաբանությունը՝ Ձեր գնահատմամբ։

-Ահաբեկել, ստեղծել վախի մթնոլորտ, այդ մթնոլորտը պարտադրել հայ հասարակությանը, ինչի հաշվին կստանա կամ հույս ունի, որ կստանա զիջումներ՝ թե՛ տարածքային, թե՛ քաղաքական, թե՛ գուցե նյութական։ Այս առումով իրավիճակը պետք է բազմակողմանի վերլուծության ենթարկվի, որովհետև բացի զուտ ահաբեկչական ակտերից, կրակոցներից, ադրբեջանական կողմը նաև հմտորեն տիրապետում է հոգեբանական ճնշման մեթոդներին․ դա կլինի անհասկանալի կենդանական դաժանության պոռթկումների միջոցով, թե բացարձակ կեղծ գաղափարներ շրջանառության մեջ դնելու միջոցով, ամեն դեպքում, Բաքուն այս ուղղությամբ ևս աշխատում է։

-Եվրախորհրդարանի վերջին հայտարարությունն ինչպե՞ս եք գնահատում։ Այն բավական ընդգրկուն է և խիստ՝ դատապարտել է Ադրբեջանի գործողությունները, անդրադարձ կա Բաքվի սեպտեմբերյան ռազմական ագրեսիային, պահանջ՝ վերադարձնել ռազմագերիներին։

-Անշուշտ, այդ հայտարարությունն օգտակար է մեր գործի համար, այն որոշակի միջազգային մթնոլորտ է ձևավորում, այն ուղղված է նաև ալիևյան ռեժիմը միջազգայնորեն մեկուսացնելուն, ինչը կարող է հիմք ծառայել, որպեսզի նույն Լաչինի միջանցքի վերաբացումն արագ ընթացք ստանա։

Հարցազրույցն ամբողջությամբ՝ տեսանյութում։

Թամարա Հակոբյան