Չավուշօղուն հայտարարել է, որ Հայաստանից ակնկալում է «անկեղծ քայլերի ձեռնարկում» խաղաղության ճանապարհին

Թուրքիայի ԱԳ նախարար Մևլութ Չավուշօղլուն Վաշինգտոնում թուրքական համայնքի ներկայացուցիչների հետ հանդիպմանը մի շարք հարցերի է անդրադարձել, այդ թվում՝ խոսել է Հայաստանի հետ հարաբերությունների կարգավորումից, գրում է Անադոլու գործակալությունը։

Նա նշել է, որ Թուրքիան ձևավորել է Արևելք-Արևմուտք միջանցքի եռակողմ ու քառակողմ երկխոսության մեխանիզմներ՝ Ադրբեջանի, Ղազախստանի ու Վրաստանի մասնակցությամբ։

«Հուսամ՝ Հայաստանը ևս կմիանա այդ գործընթացին, այսինքն՝ անկեղծ քայլեր կձեռնարկի խաղաղության ճանապարհին։ Ցավոք, վերջին ժամանակներում բանակցություններում մենք հետ քայլեր ենք դիտարկում։ Այսօր պետքարտողար Բլինքենն ասաց, որ ՀՀ վարչապետ Նիկոլ Փաշինյանն անկեղծ է, սակայն մենք ցանկանում ենք դա տեսնել գործով, ոչ թե խոսքով»,- ասել է Չավուշօղլուն։

Ի դեպ, նա չի անդրադարձել Ադրբեջանի կողմից Լաչինի միջանցքի փակմանը, ինչպես նաև այլ մանրամասներ չի հաղորդել, թե ԱՄՆ պետքարուղարի հետ Հարավային Կովկասին առնչվող ի՞նչ հարցեր են քննարկել։

Չավուշօղլուն նաև խոսել է Թուրքիայի և Հայաստանի միջև հարաբերությունների կարգավորումից։

«Ես կարող եմ բաց հայտարարել, այդ թվում՝ եղբայրական Ադրբեջանի անունից. Անկարան և Բաքուն անկեղծորեն հակված են Երևանի հետ հարաբերությունների կարգավորմանը»,- ասել է նա։

Հիշեցնենք, որ Չավուշօղլուն Վաշինգտոնում հանդիպում է ունեցել ԱՄՆ պետքարտուղար Էնթոնի Բլինքենի հետ երկու երկրների ռազմավարական մեխանիզմի շրջանակում, որի ընթացքում քննարկվել է նաև Հարավային Կովկասում խաղաղության հաստատումը։

Էմմա Չոբանյան