16.01.2026 | 23:30
Ավարտվել է Հայաստանի շախմատի տղամարդկանց և կանանց առաջնությունների 4-րդ խաղափուլը
Վաշինգտոնում Բլինքենն ու Չավուշօղլուն քննարկել են Հարավային Կովկասում խաղաղության հաստատումը
Քաղաքականություն
19.01.2023 | 12:28
ԱՄՆ պետքարտուղար Էնթոնի Բլինքենը և Թուրքիայի ԱԳ նախարար Մևլութ Չավուշօղլուն հունվարի 18-ին Վաշինգտոնում ԱՄՆ-Թուրքիա ռազմավարական մեխանիզմի 4-րդ հանդիպումն են անցկացրել։ Պետքարտուղարությունը հրապարակել է համատեղ հայտարարությունը, որի համաձայն՝ կողմերը քննարկել են երկկողմ համագործակցության հարցերի լայն շրջանակ և ընդգծել իրենց գործընկերության նշանակությունը՝ որպես ՆԱՏՕ-ի դաշնակիցներ:
Բլիքենն ու Չավուշօղլուն վերահաստատել են իրենց հանձնառությունը հստակ և արդյունքների վրա հիմնված երկկողմանի դրական օրակարգին։ Նրանք քննարկել են ԱՄՆ-Թուրքիա պաշտպանական գործընկերության ամրապնդումը, ներառյալ՝ Թուրքիայի F-16 կործանիչների արդիականացումը:
«Պետքարտուղար Բլինքենն ու նախարար Չավուշօղլուն ընդգծել են իրենց միանշանակ աջակցությունն Ուկրաինայի ինքնիշխանությանն ու տարածքային ամբողջականությանը Ռուսաստանի անընդունելի պատերազմի դեմ և վերահաստատել իրենց աջակցությունը պատերազմին վերջ տալու համար լուծում գտնելու հարցում։ Միացյալ Նահանգները շնորհակալություն է հայտնել Թուրքիային իր դերի համար՝ Սևծովյան հացահատիկային նախաձեռնությանը միջնորդելու հարցում, և երկու կողմերին, որոնք ծրագրում էին այս փրկարար մեխանիզմի անհրաժեշտությունը՝ աշխատելու հացահատիկի համաշխարհային պահանջարկը բավարարելու ուղղությամբ»,- ասվում է հայտարարության մեջ։
Կողմերը քննարկել են նաև Հարավային Կովկասում զարգացումները։
«Պետքարտուղար Բլինքենն ու նախարար Չավուշօղլուն որոշել են ընդլայնել համակարգումն ու համագործակցությունը Հարավային Կովկասում խաղաղության հաստատման համար»,- ասվում է հաղորդագրության մեջ։
Նրանք նաև քննարկել են ՆԱՏՕ-ի համակարգումն ու համերաշխությունը, ներկայիս սպառնալիքների և մարտահրավերների պայմաններում այն ամրապնդելու ուղիները, վերահաստատել են իրենց երկարամյա հանձնառությունը հավաքական պաշտպանությանը՝ որպես դաշնակիցներ, ինչպես նաև ՆԱՏՕ-ի Բաց դռների քաղաքականությանը: Նրանք քննարկել են Ֆինլանդիայի, Շվեդիայի և Թուրքիայի կողմից ստորագրված եռակողմ հուշագրի իրագործումը՝ ուղղված Ֆինլանդիայի և Շվեդիայի՝ ՆԱՏՕ-ին միանալու հայտն առաջ մղելուն:
Կողմերը քննարկել են իրավիճակը Արևելյան Միջերկրականում ու համաձայնել կայունության և հաղորդակցության ուղիների պահպանման կարևորության շուրջ։
Նրանք վերահաստատել են ահաբեկչության դեմ պայքարի անհրաժեշտությունը՝ իր բոլոր ձևերով և դրսևորումներով։ Այս համատեքստում Միացյալ Նահանգները և Թուրքիան նախատեսում են հակաահաբեկչական խորհրդակցություններ անցկացնել որպես Ռազմավարական մեխանիզմի մաս՝ հիմնվելով նախկինում գոյություն ունեցող համագործակցության վրա՝ իրավապահ մարմինների և տեղեկատվության փոխանակման միջոցով: Երկու կողմերը նախատեսում են սերտ համագործակցություն ահաբեկչական կազմակերպությունների, մասնավորապես՝ ԻԼԻՊ-ի և PKK-ի դեմ պայքարում։
Նրանք քննարկել են նաև սիրիական ճգնաժամի բոլոր ասպեկտներն ու վերահաստատել Միացյալ Նահանգների և Թուրքիայի հանձնառությունը Սիրիայի գլխավորած քաղաքական գործընթացին՝ համաձայն ՄԱԿ-ի Անվտանգության խորհրդի 2254 բանաձևի։ Երկու կողմերն անդրադարձել են նաև Մերձավոր Արևելքի և Աֆրիկայի ավելի լայն խնդիրներին, ներառյալ տարածաշրջանային կայունության և կապերի ստեղծման անհրաժեշտությունը տնտեսական և անվտանգության ոլորտում համագործակցության ավելացման միջոցով:
Բլինքենն ու Չավուշօղլուն բարձր են գնահատել ԱՄՆ-Թուրքիա երկկողմ առևտրային հարաբերությունների շարունակական աճը, վերահաստատել են տնտեսական համագործակցության կարևորությունը։
Նրանք որոշել են շարունակել իրենց ներգրավվածությունը Ռազմավարական մեխանիզմի հովանու ներքո՝ վերանայելու առաջընթացը իրենց երկկողմ օրակարգում:
Էմմա Չոբանյան
