Հնդկաստանը բնակչության թվով առաջ է անցել Չինաստանից

Հնդկաստանը բնակչության թվով գերազանցել է Չինաստանին. անցած տարվա վերջին այս երկրում ապրում էր 1,417 միլիարդ մարդ, ինչը 5 միլիոնով ավելի է, քան Չինաստանում, վկայում են World Population Review-ի կողմից հունվարի 18-ին հրապարակված տվյալները:

Չինաստանի իշխանությունները նախօրեին հայտարարել էին, որ 2022 թվականին երկրի բնակչությունը 1960-ականներից ի վեր առաջին անգամ, նախորդ տարվա համեմատ, նվազել է 850 հազար մարդով։ Չինաստանի Ժողովրդական Հանրապետության վիճակագրության ազգային բյուրոյի տվյալներով՝ այժմ երկրում ապրում է ավելի քան 1,411 միլիարդ մարդ։

World Population Review-ի գնահատմամբ՝ հունվարի 18-ի դրությամբ՝ Հնդկաստանի բնակչությունը հասել է 1,423 միլիարդի:

Մեկ այլ հետազոտական կազմակերպություն՝ Macrotrends-ը, պնդում է, որ Հնդկաստանում ապրում է 1,428 միլիարդ մարդ։
Հնդկաստանը պաշտոնապես իր բնակչության թվի մասին թարմ տվյալներ չի հաղորդել։ Այս երկրում տասը տարին մեկ մարդահամար է անցկացվում, սակայն 2021 թվականին այս գործընթացը հետաձգվել է կորոնավիրուսի համաճարակի պատճառով։ ՄԱԿ-ը կանխատեսում էր, որ 2023 թվականի վերջին Հնդկաստանը բնակչության թվով առաջ կանցնի Չինաստանից։

Հնդկաստանի բնակչության կեսը 30 տարեկանից ցածր է։ Շուրջ 800 միլիոն մարդ կառավարությունից անվճար սնունդ է ստանում, սա ամենամեծ նման ծրագիրն է։

Նոյեմբերին աշխարհի բնակչությունը, ՄԱԿ-ի գնահատականներով, հասել է 8 միլիարդ մարդու: Համաձայն World Population Review-ի՝ աշխարհի բնակչության թիվը 1 միլիարդ մարդով ավելացնելու համար պահանջվել է 12 տարի:

Տաթև Ֆռանգյան